喺日常生活中，经常听到一啲盏鬼趣致嘅白话歇后语。比如喺打麻雀嘅场合，一家输咗唔少，就会话我已经系“水瓜打狗———唔见咗一大截”啦。另一家输得重多嘅亦埋怨：今日唔系打牌日，我直情系“二叔公莳田———听殃(等秧)”。而赢家往往识得安慰一下：牌未打完，你重可以“二叔公割禾———睇下截”啰。
喺收集广州话歇后语嘅过程中，觉得其特点有三：一系地方特色。如“沙湾灯笼———何苦(府)”，就系出自番禺沙湾，由于当地人多姓何，挂出大门嘅灯笼自然就写上“何”字。又如“潮州二胡———自己顾自己”、“三水佬睇走马灯———陆续有嚟”，以及“鼎湖上素———好斋”都系各自地方独有风采。二系民俗特色。如“疍家鸡见水———有得睇，冇得饮”，“疍家婆打仔———唔忧你飞上滩”，都反映咗水上人家生活，喺船上，养嘅鸡梗系见到河水都饮唔到，而细路仔畀阿妈打亦无处可逃。又比如“卖鲩鱼尾———搭嘴”、“卖鱼佬———有声(腥)气”、“阿均卖鱼头———好噏唔噏”等等呢几句都系同卖鱼行当有关。三系民间人物特色。开头提到嘅二叔公重有唔少歇后语，如“二叔公炒冷饭———冇啲新嘢”、“二叔公唱咸水歌———冇晒谱”。其他人物亦有：“阿兰嫁阿瑞———类斗类”、“铁木真打仔———大汗耷细汗”、“陆荣廷睇相———唔衰摞黎衰”、“陈景华派烟———送终”。
白话歇后语除咗呢三个特点之外，仲有一个值得留意嘅就系好多都有出处或者讲系有典故。好似头先陆荣廷睇相呢句，就系曾任广东都督嘅陆荣廷，一次心血来潮，衣衫褴褛入算命馆睇相，想试探一下睇相先生嘅眼力。点知畀相士“小神仙”一语道破天机，话佢“唔衰摞嚟衰”，意谓佢本系个显赫大官，缘何扮成穷人模样，不衰而偏要装成衰样。后来大家就将好地地嘅事情搞到衰坏境地谓之“陆荣廷睇相”。而陈景华系民国时期广东警察厅厅长，每到死刑犯人行刑前，会畀佢一支香烟。因此坊间就有“陈景华派烟———送终”或“陈景华派烟———唔慌好嘢”一说。仲有一句歇后语典故有历史价值，系“陈济棠占卜———以为有机”。1936年，得到广西军阀李宗仁、白崇禧怂恿，南天王陈济棠准备公开反蒋，请高人占卜，得四个字：机不可失。于是乎心雄胆壮，打出反蒋大旗。但系兵尚未动，陈济棠赖以自豪嘅广东空军畀蒋介石收买，全部飞机飞到南京；跟住陆军亦相继离散，南天王变成孤家寡人，只好夹起细软走佬。呢个时候，陈济棠才悟到，原来“机不可失”嘅意思，唔系时机而系飞机唔可失。呢句歇后语后来就用嚟比喻同一个字，如果理解成唔同意思，就系“打边炉同打屎忽———两码事”。
