དམར་ཁ་ཚ།
ཡུམ་ཆེན་ལགས་ བྱམས་ལྡན་མ་ཁྱེད་ཀྱི་པད་དཀར་འདབས་ལོའི་འཛུམ་ཞལ་ལ་ལོ་ཟླའི་གཉེར་མས་མ་གཙེས་པར་བདེ་ལེགས་སམ།
ཁྱིམ་ཐོ་དང་ལག་འཁྱེར་སྟེང་གི་སྐྱེ་སྐར་འདི་ངའི་སྐྱེ་སྐར་ཡིན་པ་བདེན་རྒྱུ་ན།དེ་རིང་ལྔ་བཞིའི་ན་གཞོན་དུས་སྟོན་འདིར་དྲིན་ཆེན་མ་ཁྱེད་ལ་སེམས་གཏིང་ནས་དམིགས་བསལ་གྱིས་བཀའ་དྲིན་ཞུ་འདོད་ཡོད།
སྐྱེས་སྐར་རོལ་ཚུལ་འདི་གང་ནས་དར་བ་དང་དོན་སྙིང་ཅི་འདྲ་ཞིག་ཡོད་པ་ཤེས་མིན་ཀུན་གྱིས་རོལ་ཞིང་ལྷག་པར་དུ་བོད་ཁུལ་ན་རོལ་མཁན་ཇེ་མང་ནས་ཇེ་མིང་ཡིན་ལ།འདིའི་ཐད་ལ་སྐད་ཆ་གང་ཡིན་འཁྲོལ་མཁན་ཡང་མང་ཙམ་འདུག ཡིན་ནའང་ངས་ལྔ་བཞིའི་ཉིན་མོ་འདི་ཁྱད་པར་གྱི་ཉིན་མོ་ཞིག་གམ་བརྗེད་དཀའ་བ་ཡིད་ལ་ཡོང་སླ་བའི་ཉིན་མོ་ཞིག་ལ་ངོས་བཟུང་ཡོད།
ལྷག་བསམ་གྱི་དར་ཟམ་དཀར་པོ་ལ་ཞུ་བ་མེད་པར་བརྟན་སེ་ཆགས་ཅིང་བྱམས་བརྩེ་ཡི་མིག་ཟུང་ཆ་གཅིག་ལ་ཟིམ་པ་མེད་པར་ཞུ་བར་གནས་ཡོད་པའི།རླབས་ཆེན་གྱི་མ་ཡུམ་ཞིག་གིས་ཡོད་དགུ་རྩལ་དུ་བཏོན་ནས་ཆུང་ཆུང་གི་ཚེ་སྲོག་ཅིག་བསྐྲུན་པར།ལུས་ཁམས་སེམས་ཁམས་གང་ཡིན་ས་ནས་གྲ་སྒྲིག་གྱ་ནོམ་པ་ཞིག་དང་།ཆོད་སེམས་བརྟན་པོ་བཞག་ནས་ཉིན་ཞག་སུམ་བརྒྱ་དྲུག་ཅུ་ལ་ཉེ་བ་ཞིག་གི་མཐའ་མའི་ཉིན་མོ་བསུ་བའི་སྙིང་སྟོབས་དེ་ན་འབར་བཞིན་ཡོད་ལ།འཁུན་སྒྲ་ལྡིར་མོ་ཞིག་གི་བར་གསེང་ནས་རེ་བ་སྤོམ་པོ་ཞིག་གི་བསུ་མ་འང་ཡོད།མི་ཡུལ་འདི་སྙེག་ནས་འོངས་པའི་ཚེ་སྲོག་གཉོམ་ཆུང་དེས་ཨག་སྐད་ཕྲ་མོ་ཞིག་གིས་འཇིག་རྟེན་དཀར་ངོགས་དང་འབྲེལ་བ་ཐོག་མ་འཇོག་དུས།ཤི་མ་གསོན་གྱི་ཡུམ་ཆེན་དེའི་སླད་མེད་འཛུམ་ཆུང་དེ་འཁྲབ་སྟོན་མཁས་པ་སུ་ཞིག་ཡིས་ལད་བསྡུས་བྱེད་ཐུབ་བམ།
རེད་དེ་ ལོ་རེའི་དེ་རིང་གི་དུས་ཚོད་འདི་ནི་ངའི་ཆེས་གཅེས་འོས་པའི་དུས་ཚོད་ཡིན་ལ།ཚེ་སྲོག་བསྐྲུན་མཁན་གྱི་ཕ་མ་མང་པོ་ཞིག་གི་གཟི་བརྗིད་མཐོང་ཞིང་རིན་ཐང་དྲན་ཡོང་།ཁྱད་པར་དུ་དེ་རིང་འདི་ནས་རླབས་ཆེན་གྱི་ཨ་མ་མང་པོའི་བྱམས་བརྩེ་དང་ལྷག་བསམ།སྙིང་སྟོབས།ཆོད་སེམས།འདི་དག་མུ་མཐའ་མི་མངོན་པའི་རྩྭ་ཐང་ཞིག་ལ་བཀྲམ་ཡང་མི་ཤོང་བའི་ངང་ཚུལ་གསལ་ལེར་ཤེས་འོངས།
ལྔ་བཞིའི་ཉི་མ་རེ་རེར་གྲོགས་གྲོགས་མོའི་ཁ་གཡང་དང་ཤིས་ཚིག་རེ་རེས་ཉིན་འདི་རྒྱུན་ལྡན་ཞིག་མིན་པར།གསལ་འདེབས་བྱེད་ཡོང་ལ་སྤྲོ་བ་འཕེལ་ཚུལ་རྒོད་པོ་འདིས་ཀྱང་ཉིན་འདི་ངའི་སེམས་ལ་ནན་མོར་བཞག་སོང་།
