བདག་ཟང་ཟིང་གི་མི་ཚོགས་དང་འདུ་འཛིའི་གྲོང་ཁྱེར་དེ་དང་གྱེར་ནས།རྩྭ་ཆུ་རི་ཀླུང་སོགས་ཀྱི་ཁེངས་པའི་ལྷིང་འཇགས་ཀྱི་ཕ་ཡུལ་དུ་འབྱོར་སོང་།
འོན་ཀྱང་བསམ་ཡུལ་ལས་འདས་པ་ཞིག་ནི།ཕ་ཡུལ་ན་བདག་གི་་དེ་སྔོན་རྒྱུས་མངའ་ཆེ་བའི་འབྲི་མོ་གཡང་ལ་མ་ཚོའི་ངུར་སྒྲ་ཐོས་རྒྱུ་མི་འདུག་ལ་གཡང་དཀར་གྱི་འབའ་སྒྲ་ནི་དེ་བས་ཀྱང་ངོ་།
སྐབས་དེར་ང་རང་ཤིན་ཏུ་རྒྱུས་མངའ་མེད་པའི་ལམ་མདོ་ཞིག་ལ་སླེབས་སོང།ངའི་སེམས་ནང་ལམ་ཁ་གང་དུ་བརྒྱུད་ནས་སོང་ན་ད་གཟོད་གཞི་ནས་རང་ཁྱིམ་དྲོད་མོ་ནང་དུ་སླེབས་ཐུབ་བསམ་ནས་ཐེ་ཚོམ་གྱིས་ཁེངས།རྗེས་སུ་ངས་ལམ་ཁ་གང་རུང་ཞིག་བདམས་ནས་བྲེལ་ཚུབཆེན་པོའི་སྒོའི་མདུན་དུ་བསྐྱོད་ནས་ཇ་ཡུམ་ཙམ་སོང་རྗེས་།ངའི་མིག་མདུན་དུ་དགོན་པ་ཞིག་མཐོང་བྱུང།དེ་ནས་རང་ཉིད་སྤྲོ་བ་དང་སྐལ་བ་བཟང་པོ་ཞིག་རེད་སྙམས་ནས་ཕྱག་འཚལ་ཚར་རྗེས་དད་གུས་དང་ཅས་ནང་དུ་འཛུལ།ཡི་སེམས་ཕམ་པ་ཞིག་ལ་དགོན་པ་དེ་ནང་བཙའ་ཆགས་པའི་ལྷ་སྐུ་འགའ་ལས་ཆོས་སྒྲ་དང་གྲྭ་བཙུན་ནི་ཡེ་ནས་མི་གདའ།དེ་ནས་རང་ཉིད་སེམས་ནང་བརྗོད་མི་ཤེས་པའི་སེམས་སྡུག་ཤིག་སྐྱེས་ནས་མར་དོན་གྲབས་བྱེད་དུས་།གློ་བུར་དུ་ཁང་པའི་ཕུག་ནས་དགོད་སྒྲའི་སྒྲ་ཞིག་ཐོས་བྱུང་བས་ནང་དུ་ཡར་འཛུལ་དུས་དེང་རབས་ཀྱི་གླུ་གཞས་ཉན་བཞིན་ཆང་དང་ཨ་རག་སྣ་ཚོགས་འཐུང་བཞིན་པའི་ཕོ་མོ་ཚོ་དང་ཚོ་བྱས་ནས་བསྡད་འདུག་ལ་ཁང་པའི་ནང་ཚོན་ཁྲའི་གློག་བཞུའི་ཁེངས་།
དེ་ནས་བདག་ཡང་མིག་ཆུ་དང་བཅས་གནས་འདི་ནས་བྲལ་ཏེ་རྒྱ་ལམ་གཞན་ཞིག་ལ་ཆས་སྐབས་ངས་ལམ་དེའི་ཐོག་ཏུ་སྐྱེ་བོས་མང་པོའི་རྡོག་བརྫིས་བྱས་པའི་ཕ་སྐད་ཀྱི་དཔེ་དེབ་རྙིང་ཧྲུལ་ཞིག་རྙེད་བྱུང།ངས་ལམ་སང་ཡར་ལན་ནས་བལྟས་གྲབས་བྱེད་སྐབས་ལམ་གྱི་འགྲམ་ནས་རང་རིགས་མིན་པའི་སྐྱེ་བོ་ཁྱུ་དངཁྱུ་ཡིས་ང་ལ་ལག་བརྡ་དང་ལྷན་དུ་སྐད་ཆ་མང་པོ་ཞིག་བཤད་ཀྱི་འདུག།ཡིན་ཡང་ངས་གཅིག་ཀྱང་ཧ་མི་གོ།་ རེད་དེ་ངས་ཁོང་ཚོས་འཕྱ་དམོད་ཀྱི་དགོད་སྒྲ་དང་བཅས་ང་ལ་ཁྱེད་རང་གི་ཕ་སྐད་སྦྱོང་ན་ཕན་ཐོགས་མེད་ལ་ཁྱེད་ནི་དེ་བས་མི་འཇོན་ཐང་ཅན་ཞིག་ག་ལ་ཆགས་སྲིད་ཟེར་བ་ཚོད་དཔག་ཀྱིས་ཤེས་ཐུབ།
ང་རང་གི་ངུར་སྒྲ་ཐོག་མ་གྲགས་སའི་ས་ཆ།ང་རང་གི་ཡོད་ཚད་ཀྱི་ཡོད་ཚད་།ང་རང་གི་ཡུན་རིང་་་་་་་་་ས་ཆ་དེར་ལ་བོད་ལྭ་གྱོན་པ་མངོན་གྱི་མི་འདུག་ལ་དྭངས་གཙང་གི་ཕ་སྐད་འཆད་མཁན་ནི་དེ་བས་དབེན།ཁ་སང་ལྷད་དང་བྲལ་བའི་དྭངས་གཙང་གི་གནས་མཆོག་འདི་དེ་རིང་བྱམས་དང་སྙིང་རྗེའི་བྲལ་བའི་དམྱལ་ཞིང་ཞིག་གྱུར་འདུག་།ངས་མིག་ཆུ་དང་སེམས་སྡུག་གིས་མནར་བའི་གནས་འདི་གྱེར་ནས་རྒྱང་རིང་དུ་འགྲོ་རྒྱུ་སེམས་ཐག་ཅད་ཡང་ས་ཆ་གང་དུ་འགྲོ་དགོས་མིན་མ་ཤེས་པའི་དུས་དེར་ངས་སྐྱོ་གདུང་གི་ངུ་འབོད་ཐེངས་གཅིག་བྱེད་དུས།ང་རང་ངུ་སྐད་དང་བཅས་གཉིད་ལས་སད་སོང།གོང་གི་རྩོམ་འདི་བདག་གི་རྨི་ལམ་གྱི་ཆ་ནས་ཀུ་རེའི་ཙམ་བྲིས་པ་ཡིན་།དྲང་མོར་བཤད་ན་ང་ཚོས་རང་མི་རིགས་ཀྱི་ཆོས་དང་རིག་གཞུང།སྐད་དང་ཡི་གེ་སོགས་ཀྱི་ཐོག་ལ་གཅེས་འཛིནདང།མ་ཉམས་གོང་འཕེལ་།ཉམས་པ་སླར་གསོ་མ་བྱེད་ན་མ་འོངས་པའི་དུས་ཤིག་ལ་རྨི་ལམ་དེ་དང་འདྲ་བ་ཞིག་འབྱུང་བ་ཉན་ཁ་ཆེ་།དེ་ན་ང་ཚོ་རྗེས་རབས་པ་ཚོས་ཤེས་རིགས་འདྲ་མིན་ལ་བརྩོན་དགོས་སྟེ་གཙོ་ཕལ་གྱི་དབྱེ་འབྱེད་ནི་གལ་ཆེ་།
