༡ ང་རང་སློབ་མཐར་ཕྱིན་རྗེས་ཐད་ཀར་ལྷོ་ཁ་གྲོང་ཁྱེར་སྨན་རྩིས་ཁང་དུ་ལས་བཀོད་བྱས་བྱུང་། སྐབས་དེར་དྲིན་ཆེན་གྱི་སྐྱེས་མས་གསུངས་དོན། ཨ་མའི་གཅེས་ནོར་སློབ་མཐར་ཕྱིན་རྗེས་ལས་ཁུངས་ཀྱང་སེམས་ལ་བསམ་པ་ཞིག་བྱུང་སོང་། མ་འོངས་པར་བུ་རང་གི་སྔར་ལས་འབད་བརྩོན་གྱིས་འགྲོ་བ་ནད་པར་བྱམས་དང་སྙིང་རྗེ། ད་དུང་རང་གི་ཆེད་ལས་འདིར་དགའ་ཞེན་སོགས་བྱེད་དགོས་པའི་སློབ་གསོ་ཐེངས་མང་རྒྱབ་བྱུང་ལ་དུས་ད་ལྟ་ཡང་སློབ་དེ་དག་ངའི་སེམས་ཁོང་རུས་པའི་གཏིང་ན་གསལ་གསལ་ཐིང་ཐིང་དུ་གནས་ཡོད། ཨ་ཅང་ཅང་། ང་རང་ལས་ཁུངས་དེར་སླེབས་པ་ནས་བཟུང་དུས་དང་རྣམ་པ་ཀུན་དུ་རང་ཉིད་ལ་ཐོབ་པའི་གྲུབ་འབྲས་དང་ཟས་གོས་སྡོད་གསུམ་ལ་སེམས་ཁྲལ་བྱེད་མི་དགོས་པ་ཚང་མ་བོད་ཀྱི་གསོ་བ་རིག་པའི་བསྟན་པ་རིན་ཆེན་འདིའི་བཀའ་དྲིན་ཡིན་པ་ཡིད་བརྣགས་ཡོད་ལ་རྒན་ལགས་རྣམ་པའི་གམ་ནས་ཤེས་བྱ་སྣ་ཚོགས་ཤེས་བྱུང་། སླད་མ་འོངས་པར་བོད་ཕྱི་གཉིས་ཀྱི་གསོ་རིག་སྦྱང་པ་བྱས་ནས་མ་འོངས་པར་སྨན་པ་ཚད་ལྡན་ཞིག་བྱ་རྒྱུའི་འདུན་པ་རང་ཤུགས་སུ་སླེབས་བྱུང་།
ཉིན་ཞིག་སྡེ་ཁག་ཏུ་ཡིག་ཆ་ཞིག་འབྱོར་སོང་། ཡིག་ཆ་དེ་སྨན་ཁང་གཞུང་དོན་ཁང་ནས་བཏང་འདུག། སྡེ་ཁག་དབུ་འཛིན་རྒན་ཀརྨ་ལགས་ཀྱིས་ཡིག་ཆའི་ནང་དོན་རང་སྡེ་ཁག་གི་ཁོངས་མི་རྣམས་ལ་རྒྱུད་སྒྲགས་བྱས་སོང་། ཡིག་ཆའི་ནང་དོན་ནི་གཞི་རིམ་དུ་ཏང་ཀྲི་པུའུ་ཧྲུའུ་ཅི་ཨང་དང་པོ་བྱེད་པར་འགྲོ་མཁན་ཡོད་མེད་སྐོར་གྱི་ཡིག་ཆ་རེད་འདུག། དེ་བས་དགོངས་དོན་དེར་དོ་སྣང་དེ་ཙམ་བྱས་མེད། རྒྱུ་མཚན་ནི་རང་ཉིད་སྲིད་འཛིན་གྱི་ལས་ཀར་རྒྱུད་མངའ་མེད་ལ་ཏང་ཀྲི་པུའུ་ཧྲུའུ་ཅི་ཨང་དང་པོ་ཟེར་བའི་ལས་གནས་འདིར་ཡང་སྙིང་ལས་ཀ་གང་བྱེད་དགོས་མིན་ཏི་འབྲུ་ཙམ་ཡང་མི་ཤེས། སྡེ་ཁག་དབུ་འཛིན་ལགས་ཀྱིས་རང་སྡེ་ཁག་ནང་དུ་གཞི་རིམ་དུ་ཏང་ཀྲི་པུའུ་ཧྲུའུ་ཅི་ཨང་དང་པོ་བྱེད་པར་འགྲོ་མཁན་མེད་པའི་གནས་ཚུལ་སྨན་ཁང་གཞུང་དོན་ཁང་དུ་སྙན་ཞུ་བྱས་སོང་། དེ་ནས་ཡུད་ཙམ་ཞིག་ལ་ང་རང་རྒྱུད་མངའ་མེད་པའི་ཁ་པར་ཞིག་སླེབས་བྱུང་། དེ་ནི་སྨན་ཁང་མི་དོན་ཚན་ཁག་ནས་ཡིན་པ་སུ་ཡིན་རུང་ཚོད་བགམ་ཐུབ་ངེས་རེད། རྒྱུ་མཚན་ནི་གཞི་རིམ་དུ་ཏང་ཀྲི་པུའུ་ཧྲུའུ་ཅི་ཨང་དང་པོ་བྱེད་པར་འགྲོ་མཁན་དེའི་སྔོན་འགྲོའི་ཆ་རྐྱེན་གུང་ཁྲན་ཏང་ཡོན་ཡིན་དགོས་པས་རེད།
སྨན་ཁང་གི་མི་དོན་ཚན་ཁག་ཏུ་འབྱོར་མ་ཐག་སེམས་ནང་དུ་ཞེས་སྣང་དང་དངངས་སྐྲགས་སྐྱོ་སྣང་གཅིག་ཅར་དུ་ཤར་བྱུང་། དབུ་ཁྲིད་རྣམ་པས་ཡིག་ཆའི་དགོས་དོན་སླར་ཡང་ཐེངས་གཅིག་བཀླགས་རྗེས་དེ་མུར་ཁོ་བོར་བརྗོད་དོན། བུ་རང་ལོ་ཆུང་ཆུང་འཇོན་ཐང་ཡོད་པའི་དངོས་གཞིའི་སློབ་མཐར་ཕྱིན་པའི་གུང་ཁྲན་ཏང་ཡོན་ཞིག་གཞི་རིམ་དུ་ཏང་ཀྲི་པུའུ་ཧྲུའུ་ཅི་ཨང་དང་པོ་བྱེད་པར་བསྐྱོད་ན་སླད་ཕྱིན་ཆད་འདུན་ལམ་ཆེན་པོ་ཡོད་པ་རེད། མི་གཞན་དང་མི་འདྲ་བའི་ལས་ཀའི་མྱོང་བ་ཞིག་ཡོང་གི་རེད་ཅེས་ཐེངས་མང་གསུངས། སྐབས་དེ་དུས་ངའི་སེམས་ནང་ཅི་ཞིག་བོར་སོང་བའི་ཚོར་བ་དང་སྐྱོ་སྣང་ཞིག་གིས་མིག་ནང་དུ་མཆི་མས་བཀང་ཡང་བྱ་ཐབས་གཞན་མེད། རེད་ལགས། ངོ་མ། ང་རང་ལ་གཞི་རིམ་གྱི་ཉམས་མྱོང་ཅི་ཡང་མེད། འོ་རེད། སློབ་ཆེན་སྐབས་སུ་ནག་ཆུ་ས་ཁུལ་སོག་རྫོང་སྨན་རྩིས་ཁང་དུ་བཤེས་གཉེན་འགྲོ་བའི་སྲོག་འཛིན་རྒན་བསྟན་སྲུང་གྲགས་པ་ལགས་དང་རྒན་ཟླ་བའི་དངོས་གྲུབ་ལགས་སོགས་ཀྱི་གམ་དུ་སྦྱོངས་ཀྱི་ལག་ལེན་ལོ་ཕྱེད་ཙམ་སྦྱང་པ་བྱས་པ་མ་གཏོགས་དེ་མིན་གཞི་རིམ་གྱི་ཉམས་མྱོང་ཅི་ཡང་མེད། དེ་ལྟར་དབུ་ཁྲིད་རྣམ་པས་བསམ་བློའི་སློབ་གསོ་དང་ཆག་གཅིག་ལས་ཀ་མང་པོ་མེད་ལུགས། ད་དུང་དཔེ་དེབ་བལྟ་ཁོམ་ཡོད་ལུགས་སོགས་གསུངས་བྱུང་། དོན་དངོས་སུ་ང་རང་གཞི་རིམ་དུ་བསྐྱོད་པར་དཀའ་ངལ་ལ་ཅི་ཡང་མི་སྐྲག། རྒྱུ་མཚན་ནི་ང་རང་ཡང་བཀྲུས་ནས་མི་དག་པའི་གྲོང་གསེབ་ཞིག་ཡིན་ལ་ཕ་མ་དང་སྤུན་ཉེ་ཚང་མ་དཔུང་པ་ས་འོག་ཏུ་བཅུག་ནས་དཀའ་ལས་ཁྲག་དྲི་ཁ་བ་རྒྱག་མཁན་རེད། དེ་བས་ཁོང་ཚོས་བཟའ་མཁས་འཐུང་མཁས་བྱས་ནས་ང་རང་སློབ་ཆེན་མཐར་ཕྱིན་པ་བཏང་བ་རེད། འོན་ཀྱང་ཁོ་བོར་སྲིད་འཛིན་གྱི་ལས་ཀའི་ཉམས་མྱོང་མེད་ལ་སློབ་ཆེན་སློབ་མཐར་ཕྱིན་པ་གཞན་དང་བསྡུར་ན་རྒྱ་ཡིག་འབྲི་ཀློག་གི་རྨང་གཞི་ཅུང་ཞན་ཙམ་ཡོད་པས་རེད།
མུ་མཐུད་འགོད་རྒྱུ།
