ཁོ་བོས་བླ་མ་རྫོང་སར་མཇལ་སྟངས།
དེ་ཡང་དྲན་གསོ་མི་ནུས་པའི་འདས་པའི་ལོ་ཟླ་ཞིག་གི་སོ་ཁ་ན།ངས་ཐོག་དང་མ་རྫོང་སར་མཁྱེན་བརྩེ་ཞེས་པའི་མཚན་འདི་གོ་ཐོས་བྱུང་།སྐབས་དེེར་དུས་ཁོང་གི་མཛད་པ་སོགས་ལ་རྒྱུས་མེད་པའི་ཕྱིར་དང་བསོད་ནམས་སོགས་དམན་པའི་དབང་གིས་དད་པའི་སྤུ་ལོང་གཡོ་བའི་གནས་ཚུལ་ཁྱད་པར་ཅན་སོགས་གང་ཡང་བྱུང་ཡོད་པ་དྲན་རྒྱུ་མེད་པའི་ཚོད་རེད།རྗེས་སུ་ཁོང་ས་སྐྱ་བའི་བླ་མ་ཆེ་ཁག་གཅིག་ཡིན་པ་དང་སྐྱབས་མགོན་ཁྲི་ཆེན་མཆོག་ལ་དམིགས་བསལ་གྱི་ཆོས་འབྲེལ་དང་དད་པ་ཡོད་པ་ཚོར་ནས་ཆེས་ཐ་མལ་བའི་ཕྱོགས་ཞེན་གྱི་དད་པ་ཞིག་རྒྱུད་ལ་སྐྱེས།ད་ལྟ་རྩ་བའི་བླ་མ་ཉིད་དུ་བཀུར་བའི་ས་བོན་ཐོག་མ་དེའང་དེའི་དུས་སུ་སེམས་ལ་བཏབ་ཡོད་པ་འདྲ།དེའི་རྗེས་སུ་མཆོག་གསུམ་བྱིན་རླབས་དབང་གིས་ཁོང་གི་གསུང་ཆོས་མི་ཡུལ་ནི་ཟློས་གར་ཁང་ཞེས་པའི་དེབ་དེ་དང་དེ་བཞིན་དྲི་བ་བརྒྱད་ཁྲི་བཞི་སྟོང་བྱ་བ་སོགས་ལ་མཇལ་བའི་དབང་གིས་ས་ཐོབ་བྱང་ཆུབ་དངོས་ཡིན་པའི་གདེང་རྙེད།སེམས་སུ་རྩ་བའི་བླ་མར་རློམ་པ་དེ་ཡང་ཁོང་གི་གསུང་ཆོས་སོགས་ལ་མཇལ་བའི་དབང་གིས་ཡིན་པ་ངེས།དེ་བཞིན་ཁོང་ལ་དད་མོས་ཡོད་པའི་དབང་གིས་ཁོང་གི་མཛད་པ་དང་འཕྲིན་ལས་སོགས་ལ་དོ་སྣང་མང་པོ་བྱས།དྲྭ་ལམ་སོགས་ནས་ཁོང་ལ་རྒྱུས་ལོན་གྱིས།ཁོང་ལ་དད་སེམས་གཙང་བའི་མི་ཚོའི་ཁ་ནའང་རྒྱུས་ལོན་གྱིས།རྒྱུས་ལོན་ག་ཚོད་མང་བ་དེའི་ཚོད་གྱི་དད་པ་ཟབ་ཏུ་སོང་།ལྷག་པར་ཁོང་གི་མཛད་པ་ཐ་མལ་བའི་སེམས་སུ་ཤོང་དཀའ་བ་དང་མཐོང་ཐོས་སོགས་ཀྱིས་ཀྱང་སྐྲག་སློང་ཡོང་བ་དེ་ཚོ་ཐོས་ཚེ་ང་ཡང་ཧ་ལས་སོང་།དེའི་སྐབས་སུ་ཐོས་པ་བླ་མ་ཁོང་གི་མཛད་པ་ཡིན་ཀྱང་སེམས་སུ་འཆར་ཡོང་བ་ནི་སྔ་མ་རྒྱ་གར་གྱི་གྲུབ་ཐོབ་འགྲན་མི་བཟོད་པ་དཔལ་ལྡན་ཆོས་སྐྱོང་དང་ན་རོ་པ།ཏེ་ལོ་པ་ལ་སོགས་པ་རྟོགས་པ་ནང་ནས་རྡོལ་ཡོད་པ་ཁོང་ཚོ་རེད།ཁོང་གི་མཛད་པ་དེ་ཚོ་དངོས་སུ་ལག་བསྟར་ཐུབ་པ་ལྟ་ཞོག སེམས་སུ་དྲན་པ་ཙམ་གྱིས་ཀྱང་བདག་གཅེས་འཛིན་གྱིས་མ་བཟོད་ནས་དངང་སྐྲག་སྐྱེས་པ་དང་ལས་དེ་ལས་མགྱོགས་ནས་མྱུར་དུ་གྲོས་འགྲོ་བསམ་པས་ཀུན་ནས་བསླང་སྟེ་སྔ་བཞིན་ཉོན་མོངས་ཀྱི་དབང་འོག་དུ་ལུས།དུས་དེང་སང་ཁོང་གིས་བཀའ་བསྟན་འགྱུར་སོགས་དབྱིན་སྐད་ལ་བསྒྱུར་གནང་མཛད་གྱིན་ཡོད་མོད།སོ་སྐྱེ་སངས་རྒྱས་ཀྱི་དགོངས་པ་མ་ལོན་པ་དང་བོད་བརྒྱུད་ནང་བསྟན་གྱི་སྙིང་བོ་མ་ཤེས་པ་ཁ་ཤས་ཀྱིས་དེ་ནི་བོད་ཀྱི་རིན་ཆེན་གཞན་ལ་བཙོང་བ་རེད་ཟེར་ནས་སྐད་མང་པོ་རྒྱབ་ཡོང་གིན་འདུག་མོད།ཁོ་བོ་ནི་དེ་ལས་ལྡོག་སྟེ་བླ་མ་ཁོང་ལ་སྔ་ལས་དད་པ་ཆེ་རུ་དང་སངས་རྒྱས་གདུབ་ཚོབ་འཁྲུལ་མེད་ཡིན་པ་རྭ་སྤྲོད་བྱུང་།སངས་རྒྱས་ཀྱིས་ཆོས་གསུངས་བ་བོད་གཅིག་པུ་ཆེད་མིན་ལ།རྗེས་འཇུག་རྒྱས་སྲས་ཚོས་བཀའི་དགོངས་པ་བཀྲལ་བའང་་བོད་གཅིག་པུའི་ཆེད་ག་ལ་ཡིན།བོད་བརྒྱུད་ནང་བསྟན་ནི་ཐེག་པ་ཆེན་པོའི་ཆོས་ཡིན་ལ།ཐེག་པ་ཆེན་པོའི་ཆོས་ཀྱི་སྙིང་བོ་ནི་གཞན་ཕན་སྒྲུབ་པ་དེ་རེད།བཀའ་འགྱུར་དབྱིན་བསྒྱུར་བྱས་ནས་སེམས་ཅན་གཅིག་ལས་ཕན་ཐོགས་མ་བྱུང་ནའང་དེ་ནི་སངས་རྒྱས་ཀྱི་དགོངས་པ་རྫོགས་པ་དང་བོད་བརྒྱུད་ནང་བསྟན་གྱི་སྙིང་བོ་ངོམས་པ་ལས་གཞན་དོན་མེད་ག་ལ་ཡིན།བཀའ་བསྟན་འགྱུར་སྒེར་དབང་བྱས་ནས་ས་རྡུལ་དང་མཉམ་པོ་བཞག་པ་ལས་མི་གཅིག་གིས་དོན་དེ་གོ་ཐུབ་བྱུང་ན་སངས་རྒྱས་ནི་དེ་ལ་ཐུགས་དགྱེས་པ་ངེས།ལྷག་པར་བླ་མ་ཁོང་གིས་གསུངས་དོན་བོད་རང་གིས་བཀའ་བསྟན་དེ་ཚོ་མ་བསྒྱུར་ནའང་མགོ་སེར་ཁོ་ཚོས་རང་འདོད་དུ་བསྒྱུར་བཞིན་འདུག་ལ།བསྒྱུར་བ་དེ་ཡང་ཚད་ལྡན་ཆགས་མེད་པས་ཁོང་གིས་བཀའ་བསྟན་ཡང་དག་གཅིག་ཡོང་ཕྱིར་བསྒྱུར་བ་ཡིན་ཞེས་གསུངས།མཁས་པ་བློ་དང་ལྡན་པ་དག་གིས་དོན་འདི་ལ་དཔྱད་ཚེ་བླ་མ་ཁོང་ལ་རྗེས་སུ་ཡིད་རང་ལས་ཚིག་ངན་བཤད་པ་ག་ལ་ཡོད།ཁོ་བོ་ཡང་དོན་གཅིག་པུ་འདི་ལ་བརྟེན་ནས་བླ་མ་ཁོང་བསྟན་པ་འཛིན་པའི་དམ་པ་དང་བོད་ཀྱི་རིག་གནས་ལ་གཅེས་སྤྲས་གནང་བའི་བོད་མི་ཡང་དག་གཅིག་ཡིན་པ་ངེས་ཤེས་བྱུང་།
འདི་ནི་ཁོ་བོས་བླ་མ་དམ་པ་རྫོང་སར་རྣལ་འབྱོར་པ་ལ་མཇལ་བའི་ཚུལ་བསྡུས་པ་ཙམ་ཡིན།
ངག་བློ་རྒྱལ་ནས།
