吾是一个土生土长个上海人，勒拉2014年01月31日礼拜五夜里向，吾写过一篇文章叫做《漫谈上海方言之－－第一次说这个“洋”字》（上海方言文章），等到第尼天个夜里向，吾畀迭篇文章改写成为《讲讲上海方言之－－第一趟谈迭个“洋”字（上海方言文章）》，两篇文章里向所讲个内容侪是搭“洋”字有关系个各类方言闲话。
像迭种类型个文章，也是吾初次畀有关于上海方言俚语闲话，唻作为我个写作题材！吾但凡是撰写个、所有有关于沪语方言俚语类别个文章，基本浪向侪会去撰写两遍个，等到第尼遍撰写个辰光，就会采用沪语版本个，覅管文章撰写个是好是坏，吾是敝帚自珍个。
吾勒拉第一趟写搭“洋”字有关系个文章个辰光，经过反复思考搭考虑以后，自家总觉着写得覅是邪气好，决定再去推倒重写。
吾又因为欢喜写作个缘故，还觉着既然自家是一个土生土长个上海人，为啥就覅好采用自家家乡地区，即沪语方言俚语唻写作啊？！吾还认为，像迭能个一种写作手法，好处是叫关多个。第一就是：既可以拓展吾写作方面个思路；第尼就是：还可以增加吾写作方面个题材；第三就是：可以表现人物方面个性格搭个性；第四就是：方言勒拉汉语世界中则是独立于普通话之外个，能激发语言个活力……
吾查阅过有关于上海迭座城市个历史，上海迭座城市开埠于1843年11月17日，伊是根据《南京条约》搭《五口通商章程》个规定，上海就勒拉迭天仔正式开埠。从而造成像上海迭座城市，既是属于一座五方杂处个城市，与此同时，伊又是最早畀开放个城市之一，因此讲，伊交关容易接受、吸收外唻文化搭多元文化，上海迭座城市文化，也是属于兼容并蓄个，勒拉老底子上海文化当中，上海人顶欢喜讲个词语是邪气多个，其中之一就是要数迭个“洋”字。畀过，伴随着改革开放个脚步覅断个前进以后，加之国家又要求每个省市统一去讲普通闲话，所以有些上海闲话讲个人就变得逐步勒拉减少，甚至于覅再去讲。其中之一就是迭个“洋”字，有可能勒拉老一辈个上海人中，至少是爷爷辈个老上海人还会得讲讲个，年轻人覅大会得讲个。
为此，就让吾举一些例子，以便能更好个说明迭种情况。
勒拉老底子上海迭座城市，要是有得一个大人，或者讲一大群大人，看到勒拉自家覅远个地方有一个小孩子，覅管伊是一个男小囡，还是伊是一个女小囡，长相就是属于邪气好看、耐看搭可爱类型个，覅仅是迭能样子，还要是伊拥有炯炯有神个大眼睛搭双眼皮，看上去活脱似像就像一个外国小孩，上海人侪是欢喜叫做“洋囡囡”。
勒拉老底子个上海，从上海畀开埠个那一刻开始起，有覅少个外国人（洋人）唻到上海，那些做各种大小生意个商贩们，最欢喜去做个一桩事体是啥么事呢？！迭个就是－－去“斩人家葱头”，利用信息方面个覅对称，客户对市场行情又覅了解，打一个时间差搭剪刀差，低价去喫进各类商品，再以高价翻倍去卖畀客户。“斩人家葱头”迭句闲话个意思就勒拉讲，对于某些覅领行情搭市面个人，只要伊拉唻买各类么事，就可以去狠狠较敲对方一记竹杠、骗人家一眼眼铜钿哦，拿低档么事高价售卖畀对方。还有一句上海方言闲话叫：“伊拉是专门做‘斩洋葱头’个生意个！”迭句闲话个意思就是勒拉讲，各类商贩们勒拉做生意个全过程当中，专门欢喜去敲一些外国佬个竹杠、骗外国佬手里向个铜钿，只因为但凡是一些初到中国搭上海滩浪向个外国人（佬），对于中国个各类情况、行情、市面以及各类人事物情侪是覅清爽两眼一抹黑个，所以就邪气容易对迭些人下手，走过路过自然是覅肯去错过个，就要去狠狠较敲一记竹杠。畀过，外国佬也不是戆大，也覅可能一直去上当受骗畀敲竹杠个，辰光一长久而久之，迭些洋人门槛也是变得越唻越精，对于中国个各类人事物情，以及各种行情，了解得交关清爽，迭个辰光再要想去狠狠较敲外国佬一记竹杠，骗骗洋人个铜钿，还要大赚一笔，就覅会得像老底子唻个便当！
吾勒拉上段文字中讲个词语“洋人”古已有之，并覅是由近代或当代国人发明出唻个。勒吾伲国家历史浪向个西汉时期，由于通过丝绸之路国际大门畀打开唻，勒拉掰搿辰光对外商贸逐渐兴起，有得交关多个外国人纷纷唻中国做生意，就出现“洋人”迭个词语，至清代国门畀打开以后，从外国唻中国个人，国人继续沿用迭个词语。
也就是从清朝末期国门畀打开以后，从外国唻到中国个人，国人尤其是上海人并覅是侪是叫做“洋人”，上海人也只有对日本人是区别对待个，搭我们隔海相望个日本，勒拉吾伲国家个东边，上海人对日本人有两种叫法，覅是叫“东洋人”，就是叫“东洋鬼子”。
勒拉计划经济年代里向个上海，使用“轨道煤气”或“液化气罐”个家庭，绝对是属于凤毛麟角邪气少个，有可能只有一些居住勒拉花园洋房里向个大户人家侪会得使用个。勒拉掰搿辰光，对绝大多数个普通家庭唻讲伐，也只好去用“煤球炉子”，经济条件稍许好一眼个人家，会去使用“煤油炉子”，某些人数唻得交关多个人家，也同样会配备一只煤油炉子个，为个就是以防备不时之需去使用个。勒拉掰搿辰光，普通人家是覅可能去使用打火机个，生炉子所要去用到个物件就是“火柴”，上海人是有得如下个两种叫法，第一种叫法：覅是畀叫做“自来火”，第尼种叫法：就是畀叫做“洋火”。像“洋火”个使用频率，就要远远较比“自来火”唻得多、唻得频繁许多，之所以上海人欢喜畀“火柴”叫做“洋火”，侪是因为“洋火”是由外国人发明出唻个，是外国人从外国引进到中国、引进到上海唻个！
勒拉老底子个上海滩，最早也要从“中华民国”开始，一些混迹于江湖（职场）中个男性，或者勒拉江湖（职场）中“讨生活”个男性，尽管绝大多数人是一个邪气普通个职员，侪需要准备好一两套邪气好个行头“洋装”，哪怕男性个经济条件是交关推板个，至少要去准备好一套“洋装”，所谓个“洋装”实际浪向就是“西装”。要是讲，所穿个迭件西装有明显凸出个破损处，又是容易畀大家去发觉，上海人顶欢喜去讲迭能个一句闲话，曰：“迭个人真是一个洋装瘪三嘛！”还有个就是，上海人曾发明名叫“假领头”个服装，“假领头”又畀叫做“节约领”，勒拉老底子个辰光，上海人穿西装还有一个规定，一定要去戴一条领带，要是穿西装个人是衬着假领头戴着领带，就算碰到天气邪气热个日脚，侪覅好畀外套脱忒，脱忒外套上海人就会讲迭能一句闲话，曰：“迭个人赤膊戴领带，真是一个洋装瘪三嘛！”……既会畀大家看覅起，还会畀议论纷纷说三道四一番！
勒拉老底子个上海滩，普通人家勒拉俗常生活中，对于钞票个数量单位是覅欢喜去讲“元”个，只欢喜去讲一个“块”字，覅管去商店里向买卖各类么事，还是去小菜场买小菜问价格、讨价还价，讲几元1斤，就算是还价成功，营业员也会勒拉背后讲：“迭个人标标准准是一个洋盘，真是有眼阿乡兮兮（滴答）个，伊今朝仔肯定是从十六铺码头刚刚上唻！”……上海人还发明一个词语叫做“洋钿”，自从发明“洋钿”迭个词语以后，勒拉讲“块”个辰光，后头眼扳数要添加“洋钿”迭个词语，比方讲：一块洋钿、五块洋钿、十块洋钿……就算是讲到角分，勒拉后头也同样是要添加“洋钿”迭个词语个，还比方讲：五分洋钿一把葱，一角洋钿三块老姜……勒拉老底子年代里向，从1955年到1987年，国家发行个各类钞票，最高票面金额也只有十块，自从诞生50块搭100块面值个铜钿以后，就覅添加“洋钿”迭个词语，因为要是去添加“洋钿”迭个词语，用上海闲话朗读起唻，就会显得覅够流畅流利，所以就覅会迭能唻使用个。尽管“洋钿”迭个词语，今早仔使用得邪气少，哪怕是正宗个上海人也覅去使用、讲个，但是，偶尔听到有人还勒拉讲，还是让人觉着交关亲切个。
正因为上海是最早开放、最早接受外唻文化搭西方文化个城市之一，勒拉俗常生活中，覅管是阿里一种类型个人，从事啥个行当，既都交关欢喜搭“洋”字有联系，还搭“洋”字沾亲带故做亲眷。
最后再让吾举例，以便能更好个说明情况。比方讲：上海人欢喜畀土豆或马铃薯就叫做“洋山芋”；充满空气或者某些其他气体个各类气球就叫做“洋泡泡”；就连讲到“蜡烛”迭个词语，也一样要勒拉“蜡烛”个前头添加迭个“洋”字，就叫做“洋蜡烛”，还有一句上海俗语讲得好：“侬迭个人真是一个洋蜡烛，勿点勿亮！”；清朝后期一直到解放初期，吾伲所使用个各种银圆，有得光绪元宝、袁大头、孙大头和“墨西哥鹰元”，上海人一律叫做“银洋钿”……
实际浪向，勒上海有关于“洋”字个词语搭故事，还是邪气多个，一时头浪绝对是讲覅光个，等到以后再讲，吾会继续去撰写个！
【备注：①：文章为作者原创；②：各种范福生老上海风情图片侪是唻源于网络上头个；③：万分感谢原创图片。】
杜老倌侠客居（陆伟）修改于2019年10月25日礼拜五夜里向
