སྤྱིར་མི་སུ་དང་སུ་ཞིག་ཡིན་ཡང་ཆུང་ཆུང་བྱིས་བློའི་ཁྲོད་དུ་ཕུགས་བསམ་ཁྲོད་ན་ཁྱིམ་གཞིས་ཤིག་ཡོད་པའི་མ་ཁྱབ་ཀྱང་བཅུ་དྲུག་གི་ལང་ཚོའི་མེ་ཏོག་ལ་མྱུ་གུ་འབུས་ཙམ་གྱིས་ཕུགས་བསམ་ཁྲོད་ཀྱི་ཁྱིམ་གཞིས་སྐྱ་བོ་ལ་ཁ་དོག་སྣ་ལྔས་བྱུགས་རྩིས་བྱེད་ངེས་ཡིན། ལ་ལས་རྒྱ་མཚོའི་ཁ་དོག་བྱུགས་ཏེ་ལྷིང་འཇགས་ལ་རེ་ཞིང་ལ་ལས་སྤང་ལྗོངས་སྔོན་མོའི་ཁ་དོག་བྱུགས་ཏེ་མཛེས་སྡུག་གི་མེ་ཏོག་འཁྲུངས་བར་རྟེན་འབྲེལ་སྒྲིག ལ་ལས་ཁ་བ་དཀར་པོའི་ཚོན་རྩི་བྱུགས་ནས་མི་ཚེའི་བཤུལ་ལམ་རོང་མོ་དཀར་པོར་རེཞིང་ལ་ལས་གསེར་མདོག་ཉི་མའི་འོད་མདངས་བྱུགས་ནས་དྲོད་འཁོལ་འཁྱིལ་བའི་ཁྱིམ་ལ་སྙེག
ང་ཡང་དེ་ལས་མ་འདས་ཏེ་ཕུགས་བསམ་གྱི་ཞིང་ས་གཤིན་པོ་དེར་རེ་བའི་མྱུ་གུ་ཕྲ་ལ་གསོན་ཤུགས་ལྡན་པ་ཞིག་ཆུ་ལུད་འོད་གསུམ་འཛོམས་པའི་གྲུ་ག་ཞིག་ལ་བཏབ་ཡོད། ས་བོན་རྡོག་པོ་དེ་ལ་གཡོ་སྒྱུ་ཁྲམ་གསུམ་མ་འདུས་ཤིང་བརྩེ་དུང་སྙིང་ལ་ཟུག་པའི་སྐྱེས་ཕོ་ཞིག་དང་འགྲོགས་ཏེ།ཁེར་རྐྱང་གི་ཚོར་སྣང་ཅིག་ཅར་དུ་དོར་ནས་འཇིག་རྟེན་ཁྲ་ཁྲ་རིག་རིག་ལ་ཁ་ལོ་བསྒྱུར་ཞིང་རྐུབ་མེད་འཁོར་བའི་སྡུག་བསྔལ་ལ་ཉམས་ཚོད་ཅིག་ལེན་པ་ལས་གཡང་ལ་མཆོང་འདང་མེད་པ།གཅེས་ཕྲུག་ལ་རུམ་དུ་བསྡུ་རྒྱུའི་བྲོ་ཁ་ཞིག་དང་ཡིད་ལ་འཛིན་རྒྱུའི་ཚིག་ཅིག་ངེད་གཉིས་ཀྱིས་ཅིས་ཀྱང་ནུས་ཤུགས་ཡོད་དགུའི་སྒྲུབ་དགོས་ལ་སྒྲུབ་ཐུབ་པའི་ཡིད་ཆེས་ཀྱང་ཡོད་པ་ཁོ་ལ་གསལ་བོ་བཤད་ཡོད།
རེད་ཡ་འདི་ལྟར་བཤད་ན་སྟོང་བསམ་གྱི་འཁོར་ལོའི་ཁྲོད་ན་མཛེས་སྡུག་ལྡན་ཞིང་ཡིད་དུ་འོངས་པའི་ཁྱིམ་གཞི་ཞིག་འཛུགས་རྒྱུ་སླ་མོ་ཡིན་ཡང་།དངོས་ཡོད་ཀྱི་དགའ་སྐྱོ་ཆགས་སྡང་གི་གཙུབ་བསྡར་ཁྲོད་ནས་ཁམས་གསུམ་དབང་དུ་སྒྱུར་བའི་ཁ་ཕོ་ཡོད་རྒྱུ་མེད་ཟེར་ན་ཐང་མོད་ཀྱང་།
རྒྱུ་མཚན་མེད་པ་མིན་ལ་ཡོད་པ་ཀྱང་དེ་འདྲ་མ་རེད།རྟོགས་བརྟག་གི་རྟ་ཕོས་སྔོན་དུ་འཁྲིད་ན་ད་གཟོད་དོན་དངོས་ཀྱི་ཤིང་རྟ་འགུལ་ལ་ལས་ཁོ་རང་ཉིད་ཐད་ཀར་དུ་བརྒྱུག་འགྲོ་བ་ཞིག་ཀྱང་མ་ཡིན་པ་གཞིར་བཞག་ནས།ངས་དེ་རིང་གི་ཁེར་རྐྱང་གི་ཚོར་འདུ་ཟབ་མོ་འདི་སྐྱ་ཡ་ལ་རློམ་ནས་སང་ཉིན་གྱི་ཉི་ཟེར་དེའི་ཆེད་དུ་ནུས་པ་ཡོད་དགུ་བཏོན་ནས་ཐད་ཀར་སོང་ན།སྙིང་ཉེ་ཉེ་བྱེད་པའི་མི་ཚེའི་སྐྱ་ཡ་དང་སེམས་གཏིང་ནས་ཤོར་སའི་གཅེས་ཕྲུག་གི་ང་བསྒུག་ཡོད་ཤག་ཡིན་ལ་ངའི་ཕུགས་བསམ་ཁྲོད་ཀྱི་ཁྱིམ་གཞིས་ནས་ང་ཚོ་མཇལ་འཛོམས་ཀྱི་འཛུམ་མདངས་དྲོན་མོ་ཡོད་ཁོ་ཐག་ཡིན།
