དུད་ཁ་དོང་སྤྲུག
གཡའ་དག་ཆུ་ཤེལ་དབང་པོ་གཞི་དབྱིངས་སུ་ཡིབས་ཤིང་།།
དགུན་ཁའི་གྲང་རླུང་ངར་མས་ལྗང་མདོག་ལ་སྡང་དུས།།
བཅུ་ཕྲག་རིག་གཞུང་ལོ་མའི་ལས་དབང་ལ་བསམ་ནས།།
མིག་ཆུའི་ངོ་གདོང་རླན་བཞིན་ལྡ་ལྡི་འདི་ཤོར་ཐལ།།
ཕ་མྱེས་སྲིད་པའི་མགོ་དཀར་རྒད་པོ་ཡི་རྔུལ་ཐིག།
ལེགས་བཤད་ནོར་གྱི་བང་མཛོད་གས་སྲུབ་དུ་ཐིམ་དུས།།
དྲན་རྟོག་སེམས་ཀྱི་ཚོར་འདུ་བཟོད་མེད་ཀྱི་ན་ཟུག།
དྲང་སྨྱུག་ཀུ་ཤུའི་རྩེ་ནས་སྲིད་པ་ན་དྲངས་བཞག།
ཚིག་ཕྲེང་ལོ་མའི་གཤོག་པ་ལྡེམ་ལྡེམ་དུ་གཡོ་ཞིང་།།
སྡེབ་སྦྱོར་གེ་སར་ཕྲེང་བ་ལམ་ལམ་དུ་གསལ་བ།།
ངག་རིག་བུང་བ་གཞོན་ནུ་དར་དིར་དུ་སྒྲོག་པའི།།
སྦྱོར་རིག་པདྨའི་ཚལ་ན་ཤར་མ་རང་འཇུག་ཅིག།
ཐུ་མིའི་དཔྱོད་ཤེས་མཚོ་མོའི་ཀློང་ཡངས་ནས་རྡོལ་བའི།།
བརྡ་སྤྲོད་དགོས་འདོད་ཀུན་འབྱུང་གཙུག་རྒྱན་དུ་འགོད་ཕྱིར།།
ཐོས་བརྩོན་མི་ནུབ་ཆུ་བོའི་རླབས་རྒྱུན་དང་འགྲོགས་ནས།།
རྨོངས་པའི་དབུལ་བར་སེལ་བའི་བསྐལ་བཟང་དེ་འཚོལ་དགོས།།
བླ་མེད་མགོན་དུ་བསུ་བའི་སྙན་འཇེབས་ཀྱི་འགུལ་དབྱངས།། དབྱངས་ཅན་ལྷ་མོས་སྦྱིན་པའི་བདེ་ལེགས་ཀྱི་སྒྲ་སྙན།།
བདེ་སྡུག་འཚོ་བ་མཚོན་པའི་གསར་རྙིང་གི་རོལ་མོ།།
ཡོད་ཚད་བྱང་ཁོག་དཀྱིལ་དུ་རི་མོ་བཞིན་ཁོད་ཅིག།
མིང་དོན་རྨོངས་པའི་འཁྲི་ཤིང་མེ་ཕུང་གིས་བསྲེག་ཅིང་།།
ཤེས་རབ་འོད་སྣང་འཇེན་པ་བདག་ཡིད་ན་བཀྲ་ཕྱིར།།
ཐོས་བརྩོན་རིག་པའི་མཚོ་གྲུ་སྣུམ་སྣོན་ལ་འཁྱུད་ནས།།
མངོན་བརྗོད་རྒྱ་མཚོ་འཁྱིལ་བའི་བརྟན་བརླིང་དུ་འཇུག་ཅིག།
སྐད་གཅིག་དུས་ཀྱིས་བགྲོད་པ་བགྲང་ཀ་ཡིས་གཞལ་ཞིང་།།
གང་ལ་ཅི་ཡང་སྣང་བའི་ཉི་ཟླ་ཡི་འཁོར་བསྐྱོད།།
འགྲོ་ཁམས་བདེ་སྡུག་མཐོང་བའི་ཀུན་གསལ་གྱི་མེ་ལོང་།།
སྐར་ནག་རྩིས་རིག་འཚོལ་བའི་གོམ་ཁ་དེ་མ་དལ།།
སྨྲ་དབང་ལྗགས་ལས་ལྡང་བའི་ངག་རིག་གི་ཚོན་རྩི།།
དབྱངས་ཅན་སྒེག་མས་བརྡུངས་བའི་འཕང་འགྲོ་ཡི་སྙན་འགྱུར།།དབྱུག་ཐོག་དབང་པོས་བསྐྲུན་པའི་མེ་ལོང་ལ་བརྟན་ནས།།
སྙན་ཚིག་གོལ་སར་འཕྱན་པའི་དགའ་སྟོན་ལ་རོལ་ཞིག།
ཐིག་རྡུལ་ལྷ་རིས་བཀོད་པ་ཕུན་ཚོགས་ཀྱི་ཕོ་བྲང་།།
གོས་འཕྲུལ་བཟོ་རིགས་གསར་རྙིང་སྐར་ཚོམས་ཀྱི་གྲོང་ཁྱེར།།
མ་དལ་བརྩོན་འགྲུས་རྐྱང་ཤེས་རྟ་ཕོ་ལ་འཁྱུད་ནས།།
མྱུར་མྱུར་མངའ་དབང་སྒྱུར་ཞིག་གངས་དཀར་གྱི་གཞོན་ནུ།།
གནའ་བོའི་འཚོལ་ཤེས་ཀློང་ནས་སྡོང་པོ་དེ་འཁྲུངས་ཤིང་།།
གཡུ་ཐོག་ཡོན་ཏན་སྤང་ནས་པད་འདབ་སྟོང་བཞད་པ།།
འཚོ་བྱེད་གསོ་རིག་པདྨའི་དགའ་ཚལ་ལ་འཇུག་དང་།།
རྟེན་འབྲེལ་གཞན་ཕན་འོད་སྣང་ཕྱོགས་ཀུན་དུ་ཁྱབ་འོང་།།
རིག་འཕྲུལ་གློག་ཞགས་འཁྱུག་པའི་ཕྱོགས་ཆོས་ཀྱི་ཐུགས་ལས།།འཁྲུངས་པའི་སྡེ་བདུན་མདོ་ཡི་ཡང་གསང་དེ་ཉུག་དང་།།
ནུབ་ཕྱོགས་མཚན་ཉིད་སྨྲ་བའི་དཔྱོད་ཤེས་ལས་རྒལ་ཏེ།།
མངོན་ལྐོག་ལྕི་ཡང་གཞལ་བའི་སྲང་མདའ་དེ་རྙེད་ངེས།།
ཕྱུག་པོའི་ནོར་རྫས་ཟད་གཏུགས་དངོས་ཡོད་ཀྱི་ར་སྤྲོད།།
མཐོན་པོའི་གོ་སར་འགོལ་བའི་གནས་དོན་གྱི་རི་མོ།།ལདུང་ཁ་དོང་སྤྲུག
ཅི་ཡང་ཚུགས་ཐུབ་བྲལ་བའི་ངང་ཚུལ་འདི་བསམ་ན།།
དམ་པའི་ལྷ་ཆོས་ལེགས་བཤད་རླབས་ཕྲེང་ལ་རོལ་ཞིག།
