— མྱིང་མེད།
ཁུ་སིམ་མེར་གནས་པའི་མཚན་མོར
ཡོད་ཚད་མུན་ནག་གི་སྒྲིབ་ཡོལ་གྱི་འོག་ཏུ་འཛུལ
ངའི་དྲན་དུང་གི་དམར་ས་དེ་ན
སྒོ་གསུམ་གྱི་གནད་སར་ཞིག་ན
གསལ་བཤད་བྱེད་མི་ནུས་པའི་གཏམ་རྒྱུད་རིང་མོ་ཞིག
སྐབས་ལ་ལར
གཏམ་རྒྱུད་དེ་ལ་ཉན་མཁན་མང་བོ་ཡོད
ལན་རེར
དེ་ལ་མྱོང་མཁན་ང་རང་གཅིག་པུ་ལས་མི་འདུག
ཆགས་གྲུམ་དང་དུམ་ཆད་ཀྱི་གྲུབ་པའི་གཏམ་རྒྱུད་དེར
ང་ནམ་ཡིན་ཡང་མི་སྣ་གཙོ་བོ་མིན
དེའི་ནང་གི་མངོན་མེད་ཀྱི་མི་སྣ་གཙོ་བོ་དེ་འོད་ཟེར་ཡིན
དེ་ནི མི་ཞིག་གི་མཚན་མོའི་རྨི་ལམ
དེ་ནི མེ་ཏོག་གི་མཛེས་སྡུག་ཅིག
དེ་ནི མཐོ་སྒང་གི་ཁ་བ་དཀར་བོ
འོན་ཀྱང གཏམ་རྒྱུད་དེར
ངའི་གཏམ་རྒྱུད་ཅིག་ཡིན་ཞེས་བརྗོད་ན་ཆོག
ཀུ་དོགས་པའི་གྲོག་རོང་ཞིག་ན
ངོས་གཟར་བའི་བྲག་དམར་ཞིག་ན
ང་རང་འོད་ཟེར་ལ་བརྟེན་ནས་འཚོ་བཞིན་ཡོད
ད་ལྟ དེ་མེད་ན
གྲོག་རོང་བརྒལ་བའི་ནུས་པ་མེད
ད་ལྟ དེ་མེད་ན
བྲག་དམར་ལས་འབབ་པའི་སྙིང་སྟོབས་མེད
ད་ལྟ དེ་མེད་ན་་་་་ གཏམ་རྒྱུད་དེའང་མེད
གླག་རྒོད་ཀྱི་གཤོག་ནས་འཕྲོ་བའི-འོད་ཟེར
མི་བུ་ཞིག་སྐྱབས་སུ་ཞུ་ཡུལ་གྱི-སྒྲོལ་མ
ཁྱེད་རང་ཡོད་པས
མི་ཡུལ་འདིར་དྲན་གདུང་གི་རི་བོ་ཡོད་ལ
ངའི་ལོ་ངོ་གསུམ་གྱི་འཚོ་བ་ལ་ཕྱིར་དྲན་གྱི་དོན་སྙིང་ལྡན
