勒拉前头，吾曾经写过一篇《如风往事之－－漫谈上海人乘风凉》（上海故事），等到两天以后，吾又畀文章改写成为《如风往事之－－讲讲上海人乘风凉》（沪语故事），后头一篇文章吾是采用沪语方言俚语唻写作个，所讲个内容就是老底子个上海、勒那些天气邪气炎热个夏日季节里向，上海人又是哪能去“乘风凉”避暑个。【备注：“乘风凉”一词是属于吴地个方言土语，普通话意思就是“纳凉”。】
对于迭篇文章，吾就决定讲一讲有关于“拖油瓶”迭桩事体哦！吾今早仔要写个迭篇文章搭之前个文章到底会有哪能一种关系啊？！之所以吾会去写关于“拖油瓶”文章，吾认为主要原因有其二。
第一个原因是：随着时代个覅断变迁搭发展，“拖油瓶”迭个词语已经呒没人再会去讲讲个，几乎可以讲是“消亡”，只有某些老一辈个上海人，至少是阿爷搭阿奶一辈个老年人，千年难扳会讲讲个。恐怕今早仔个年轻一代，就覅一定晓得“拖油瓶”一词个意思。
第尼个原因是：吾勒撰写有关于上海人是哪能唻乘风凉个文章当中，有去记录老底子上海人，还勒乘风凉个辰光，是交关欢喜嘎“嘎讪胡”谈“谈山海经”是有关系个，勒拉期间会讲到“拖油瓶”！【备注：“嘎讪胡”搭“谈山海经”两组词普通话就是讲“聊天”。】
吾勒撰写上海人乘风凉个文章当中，有关于“嘎讪胡谈山海经”个内容，吾是迭能唻讲个，意思是讲：乘风凉个辰光，嘎讪胡谈山海经是覅可缺少个一项活动，邻舍隔壁之间自然就会分享各类趣闻轶事，还有覅少个家庭还会张家短李家长，拿其他人个某些丑事侪讲出唻，吾有一位曾经个邻居加同学徐涛，就是迭能样子个，就因伊长得活脱似像一个外国佬，伊个爷娘覅是外国人，侪会畀大家唻讲！……
上段文字记录个内容，是发生勒吾伲一家四口已经搬迁住进掰搿辰光由“房管所”建造个新工房，勒拉迭个前头所居住个房子是房管所个私房。所住个房子呈现近乎“L”形状，层高是六层楼个房子，有三个门洞，一楼三户人家，共计有五十四户人家。【备注：老底子“房管所”，即今早大家所讲个“房管局”，只畀过调换一个名称！】
勒拉掰搿辰光，所居住个新工房，有三分之一是原拆原还个原住居民，吾个家庭就是属于原拆原还个原住居民，还有三分之二个居民，侪是从事各类搭石化行业有关系个普通工人。仍旧勒拉掰搿辰光，尽管每户人家侪安装电风扇，基本浪向每户人家侪有两台电风扇，只因勒新工房前头有一块大场地，尽管每年进入到夏季时节个辰光，天气是炎热个，基本浪向每天依旧会有邪气大个穿堂风穿堂而过，每每一到夏日时节个傍晚，辰光基本浪向勒傍晚五点钟到七八点钟之间，还会有邪气多个邻居出唻乘乘风凉，边吃夜饭边嘎讪胡谈山海经。
大家主要调侃伊拉个大致意思是勒讲，吾个同学徐涛长得像一个外国人，黄头发，眼睛是一蓝一黄个，伊个爷娘并覅是外国人，还讲伊个姆妈肯定是勒外头，搭一些勿三勿四个人，七搭八搭搞七廿三生出唻个，伊“肯定覅是伊拉爷老头子生出唻”个，伊拉爷老头子一定会寻找伊个姆妈算总账，伊就是伊个姆妈“拖油瓶”拖唻个……
吾还能清爽个记得勒拉掰搿辰光，勒乘风凉嘎讪胡谈山海经个辰光，“拖油瓶”个次数搭内容是讲得邪气多，基本浪向每年到入夏时节，天天侪要去讲讲个，而且其他人是覅会去讲讲个，就是盯牢吾曾经个邻居徐涛去讲，是开玩笑个去讲，伊还是吾个小学同学，讲得辰光一长久而久之，侪畀老茧也听出唻，已深深个印勒脑海里向！
为啥要去讲曾经个邻居（同学）徐涛呢？！只因为伊搭其他人是有得邪气明显个区别，伊长得活脱似像一个外国佬，皆是因为伊本人从小到大，一直要到还呒没开始发育个前头，头发是金黄色个，通常情况唻讲，正常人个眼睛，眼乌子是黑色，眼底是白色个，然而伊个眼底搭其他人是有所覅同个，很像波斯猫个颜色，伊个一只眼睛个眼底是蓝颜色个，另外一只眼睛个眼底是黄颜色个，而且伊个鼻头大而坚挺像一只大蒜，伊个爷娘侪始终认为迭个是一种覅好个毛病，一定要想方设法去看好病，每隔几年就带伊去沪上各大医院求诊看病、遍访各处个名医，却始终侪呒没去看好。至发育开始头发逐渐勒金黄色中夹带有黑颜色，没过多久吾家搬迁到另外一个城镇上居住，彼此之间也就失去联系，至于以后是否侪是变成黑色，吾是覅晓得个。
正是因为伊搭其他人有与众覅同个地方，所以讲伊搭伊个家庭，侪会勒夏季乘风凉，成为大家嘎讪胡谈山海经调侃个好对象，只要是去调侃伊搭伊家庭个人，彼此之间覅仅是属于交关熟悉个，而且还是知根知底，已经是相处有十几年个老邻居，尽管每趟伊搭伊个爷娘经过个辰光，总归要畀大家调侃一番，伊拉始终侪呒没气恼过，仅仅以微笑个态度回应大家。吾个爷娘曾经对吾以及大吾五岁个亲大哥教育过，讲迭能去做个人，就是属于邪气推扳个一桩事体，如果倷兄弟两也跟着去做，就是呒没素质个人，还会责怪爷娘呒没教育好倷两人，其他人去做，就让伊拉去做好勒，吾伲就覅要跟着一道去做！……故而吾伲一趟侪呒没调侃过伊拉，也呒没随波逐流个去随声附和。
勒拉前头，吾花费有交关多个笔墨勒拉讲关于“拖油瓶”迭个词语，嘎么，像“拖油瓶”迭个词语，伊到底又是哪能唻个呢？！据吾所查阅到各种历史资料以后，侪让吾晓得并弄明白迭个词语个出处，“拖油瓶”迭个词语，最早就是出现勒吾伲国家历史浪向个明朝末年时期，就勒明朝末年，凌玄房凌濛初编著有拟话本小说集《初刻拍案惊奇》一书，就勒书籍当中，还勒卷三十三中，伊是迭能唻讲到个，讲道：“天祥没有儿女，杨氏是个二婚头，初嫁时带个女儿来，俗名叫做‘拖油瓶’。”覅仅是迭能哦，勒吾伲国家历史浪向清朝末年，李伯元李宝嘉撰写有《官场现形记》一书，就勒卷40当中，伊也唻讲道：“不是你父亲养的，难道是你娘拖油瓶拖来的吗？”勒吾伲国家近代中国，著名个出版家邹韬奋撰写有《萍踪寄语》一书，勒《萍踪寄语三集》中写道：“像我国所谓‘拖油瓶’的侮辱妇女和孩子的极端野蛮无理名词，是在男女平等的社会里是不容存在的。”……
像“拖油瓶”迭个词语，实际浪向就是指从前个中国人，历朝历代同样也是要包括勒其间个，对于各式各样个原因，需要另外再去改嫁个妇女（人），而且还是带有小囡个，“一种十分歧视性个称呼”。就勒吾伲国家个古代社会，至少一直要保持到民国时期，对于一些需要再嫁个妇女（人），一律侪统称伊拉为“再蘸”。对于搭前夫所生个小囡，畀带到后夫个屋里向去勒以后，一律俗称为“拖油瓶”。
畀过，吾自家则是迭能唻看待、认得并去认为“拖油瓶”迭个词语个，吾一直以为绝对是畀大家以讹传讹哦，而且还带有一些误解个成分勒里向，认为只有再嫁个妇女（人），而且还是属于有小囡个妇女（人），侪是会去使用迭个词语，是属于迭个一类人个专用名词。
其实不然并覅是迭能样子个，伊最为正确个讲法就是应该畀叫做“拖有病”迭个词语，而并覅是“拖油瓶”迭个词语哦。就勒吾伲国家个古代社会，历朝历代，从上到下，一直勒讲啥个“三纲五常”，覅管是身处勒何种社会阶层里向个妇女（人），等到自家个男人驾鹤西去以后，就坚决覅可以再去嫁啥个男人个，既覅管迭个妇女（人）个年龄有几何，也覅管迭个妇女（人）个年龄，到底岁数是属于邪气大，还是岁数是属于交关小，侪是一致要求妇女（人）去守一辈子个活寡，守活寡一直要守到妇女（人）驾鹤西去为止，迭个就是吾伲国家古代个法律法规、一个道德标准搭行为准则，一旦有出现再嫁个妇女（人）以后，自然就是覅需要多去讲一眼啥么事个，会畀绝大多数多个人或家庭看覅起个，还要畀大家议论纷纷说三道四指指点点一番……
畀过，对于吾伲国家历史浪向、历朝历代个妇女（人）唻讲伐，基本浪向可以讲呒没啥个收入唻源，也是覅大可能外出去打工养活自家个，因此讲有些妇女（人）因为迭能搭伊能个种种原因，还只为能够更好个生存下去，覅得覅另外再去嫁一个男人，迭个也是属于无可非议个一桩事体，一般能够迭能去做个妇女（人），像迭能一类人家家境侪是属于邪气推扳个。勒拉掰搿辰光，天灾人祸也是属于交关频繁个，一旦寡妇所带唻个子女，到新个夫家以后，要是有啥个三长两短，往往就会引起前夫屋里亲属覅停歇个刁难搭责难。对于后夫个家庭唻讲伐，只为避免产生迭能一类个纠葛搭纷争，往往勒娶寡妇做自家个正妻或小妾个闲话，自然就要去邀请一个覅相关、呒没丝毫利害关系个人，订立下一个字据，讲清爽前夫子女唻到吾屋里向，就已经是属于一个有病个人，今后一旦有遭遇到啥个覅测个辰光，搭后夫则是呒没关系个。因而大家就把再嫁妇女个子女称之为“拖有病”。由于“拖有病”搭“拖油瓶”字音极其相近，因而畀大家讲“拖油瓶”。
其实，勒吾伲国家历史浪向个古代妇女（人），伊要是另外再去嫁一个男人，可以讲就是属于万不得已、不得已而为之、穷途末路个一桩事体，伊如果覅是走到最后要紧关头个闲话，绝对是覅会得去走迭条路个，伊本人对于自家是覅会去考虑一眼啥么事个，最为主要个一个原因为个就是－－为自家个子女去做一个打算搭考虑、能有一个依靠，但凡是一定要迭能唻做个妇女（人），勒绝大多数个情况下头，子女从小就失去自家个爷老头子，姆妈又是呒没啥个经济唻源个，只有邪气少数个妇女（人），迭些人个爷娘因为过日脚实在是过覅下去以后，覅是一条路浪向个人，双方只好以离婚个方式收场，加之男方是覅大欢喜女孩子，畀女孩子判畀女方。女方只为能够生存并存活下去，只好另外再去嫁男人，畀小女孩一道带过去。还因为勒吾伲国家历史浪向古代社会，绝大多数个妇女（人）是属于家庭妇女搭附属品，也是呒没工作畀伊去做个，除忒嫁男人，是呒没其他好办法个。就像上述迭种情况，勒拉吾伲国家个古代时期，概率也是属于邪气小个。
勒老底子个辰光，男人要是自家个妻子驾鹤西去以后，至少到民国前头，可以重新再娶一个妻子，像迭种做法就畀叫做“续弦”，妇女（人）要是自家个男人驾鹤西去以后，要是再去寻觅一个丈夫，既是覅可以个，也是属于邪气困难个，除忒会畀大家群起而攻之议论纷纷说三道四一番以外，搞覅好，还有可能畀众人捆绑起唻，关进笼子里，再勒笼子个里向放上重砖（石）头，沉到江底下头淹死，成功个概率也是相当低个，但并覅表示呒没，多多少少还有一眼眼个！
从民国开始就没关系，妇（女）人搭今早个男人过覅下去就可以离婚，还可以再去寻找另外合适个男人嫁畀伊，覅允许嫁男人就讲得交关少勒，甚至还有专门为迭种类型个妇人（女）做媒人个人！
今早因开放、人个思想也跟着进步，老百姓对于各种情况见得较多，尤其是结婚搭离婚变得交关多，更是见怪覅怪个一桩事体。勒老底子“拖油瓶”主要是指“女方搭前夫生个小囡带到后夫屋里向”，实际男方勒再婚个辰光，有可能带着搭前妻生个小囡，也好称之为“拖油瓶”，所以“拖油瓶”就覅单单是针对女方，也可以指男方。
但凡是“拖油瓶个人家”，也是呒没办法个一桩事体，“拖油瓶”伊从小就失去勒爷老头子，万不得已只好跟自家个姆妈去重新认一个男人作为“自家个爷”，既覅管伊是一个男小囡，还是一个女小囡，也覅管日脚是过得邪气好，还是过得交关推扳个，伊本人个身世已经是属于“残古作孽”个一桩事体，吾伲就覅要再去讲点啥么事，也是覅应该取笑迭种类型个人，就像迭种做法也是属于覅大对头个！
畀过，话虽然是迭能唻讲个，果真要迭能去做个闲话，还是蛮难、相当有困难个，有许许多多个人（群），还是会得针对迭种类型个家庭，要去说三道四、窃窃私语、流言蜚语、评（品）头论足一番……
自然会有一部分人家，始终勒畀大家嘲笑、鄙视搭阴影下头，艰辛生存着，因为覅堪忍受，性格一步一步个向极端走去，从此以后就开始自暴自弃仇视周遭搭社会，寻到好时机时就开始报复社会。
也有勒拉各个方面侪是邪气好个拖油瓶家庭，通过个人自强不息搭努力，刻苦自律、时刻激励着自家，能够从逆境中崛起，成为一代伟人搭宗师。比方讲，勒吾伲国家历史浪向，最出名个拖油瓶人家，还是要数北宋时期个思想家、政治家、文学家范希文范仲淹。就勒伊两岁个辰光伊个爷因生病亡故，姆妈谢氏是呒没收入搭依靠个，邪气贫苦覅堪，当就快要活覅下去个辰光，只好带年幼个尼子改嫁畀掰搿辰光平江府推官朱文翰，搭继父姓改名为朱说，于1009年离家到长白山醴泉寺借读，迈开伊改变自家命运个第一步路。有一句成语叫做“划粥断齑”，所讲述个内容就是范仲淹勒拉小辰光苦读书个故事。
当历史个这部列车驶入到1015年个辰光，范仲淹通过自家覅间断个勤奋努力，考中进士并进士及第，畀姆妈接到自家个身边归养，迭个还覅算啥个，后唻等到伊过29岁生日个辰光，又重新启用“范”姓迭个姓氏，迭个辰光个范仲淹已成名交关有名气，写出交关多脍炙人口个好文章，最出名个文章还是要数《岳阳楼记》，“先天下之忧而忧，后天下之乐而乐”……千百年唻，覅晓得畀多少心怀大志个人所引用，伊还直言不讳个向世人宣布，自家就是属于一个拖油瓶个身份！
【备注：①：文章为作者原创；②：各类和文章有关个图片侪是唻源于网络上头；③：万分感谢原创图片】
杜老倌侠客居（陆伟）写于2018年08月19日礼拜日夜里向
