广州人有句口头禅：“便宜莫贪，蚀底咪制”。前半句好理解，亦得到广泛认同，正所谓“边有咁大只蛤乸随街跳”，便宜冇好货，贪小便宜会吃大亏嘅例子俯拾皆是。但后半句“蚀底咪制”就复杂啲，往往因时因地见仁见智，未必正确。
好多时候，“蚀底咪制”嘅观点反映咗广州人务实作风同维权意识。最常见嘅例子就系去餐厅酒楼食饭，如果食品同服务质量差，好多时会唔客气投诉，而唔系懒大方扮阔佬或者怕惹事扮鹌鹑。问题在于此观点唔能够唔分场合一味强调。无可否认，一部分广州人坚决唔想、唔肯甚至担心吃亏嘅言行举止有时会过分咗，成为笑柄。好似成日话“执输行头惨过败家”，大街上若有大群人围住就忍唔住要去凑热闹，“倒泻屎都要行嚟睇番份”；见到有人排队，亦即刻跟队排埋去再补问何事，慌死走宝。但如果要其见义勇为、出手相助或者参加公益活动，就撒手拧头，“鸡咁脚”走夹唔抖。为此，当下有必要抵制、甚至反对“蚀底咪制”思想，多啲宣传“蚀底冇偈，吃亏是福”嘅中国古德。
宋代曾经流传过一个“瘦羊博士”嘅故事。皇帝派人赶来一群羊，赐畀几十位博士每人一只羊，羊只大小不等，肥瘦不一，难以公平分发。大家正感到左右为难时，一位叫甄宇嘅博士话：“一人摞一只吧，我先摞。”有人嘀咕：“若果将大只嘅摞走咗，剩番细只嘅点算呀？”然而，出乎大家意料，甄博士摞走咗一只最细最瘦嘅羊。此后大家都拣最细嘅羊，羊分完后冇人有怨言。后来事情传到咗皇帝耳中，甄宇因此得咗“瘦羊博士”美誉，后又提拔为太学博士院院长。从表面上睇，甄宇摞走细羊系蚀底，但却得到了群臣拥戴，皇上器重。华人首富李嘉诚话：“有时看似是一件很吃亏的事，往往会变成非常有利的事。”先前蚀后来赚、短期蚀长期赚同局部亏全盘盈嘅实例，喺李嘉诚传奇式嘅发展生涯中不胜枚举。
“蚀底冇偈，吃亏是福”系一种境界，更系一种睿智。能够抵得蚀底、唔怕吃亏嘅人，往往一生平安，幸福坦然。唔肯蚀底吃亏嘅人，目光短浅，斤斤计较，局限喺狭隘利益同自我思维中，最终失去嘅反而更多。
当然讲就易，做就难，理论赞同都可以，实际处理就唔得。需要从我做起，从现在做起。唔知会唔会有一日，嗰句广州人口头禅改为：“便宜莫贪，蚀底冇偈”呢？
