当历史个车轮走到今早仔，恐怕对于那些出生勒拉20世纪90年代个一辈人唻讲伐，“零拷”迭个词眼就是属于邪气陌生个词眼，就算拨迭两个词眼侪写出唻看一看，还覅一定会晓得是啥个意思。
像迭个词眼放勒今早，几乎可以拨放进“文字博物馆”当中去，伊所要表达个含义就是勒拉讲：迭个词眼沪语方言闲话当中，就拨广泛个运用到搭各种液体、半液体一类物品，有关系个当中去哦。
当国家搭老百姓还身处勒拉计划经济个年代里向，勒掰搿辰光，各种物资侪覅是属于丰富多彩个，商品也是邪气紧缺个，就勒各式各样个商店里向，还会拨各种散装类别个商品，侪是去按照分量唻售卖个。就连各种液体搭半液体商品，伊也同样是迭能样子唻做个。
吾是一个土生土长个上海人，勒吾所在个城市，像“零拷”迭个词眼，却是属于的的刮刮搭本乡本土个沪语方言闲话，虽讲沪语方言闲话，同样也是属于“吴语方言搭文字体系”个，拨过，也只有上海迭座城市发明迭个方言词眼，其他个吴语方言体系则是呒没迭个词眼个。勿单单是迭能样子唻，像“零拷”迭个沪语方言词眼，伊同样也是拥有计量单位个，伊顶小个计量单位就是－－迭个“两”字。
只为能更好个说明迭种情况，就让吾事先唻列举迭个方面个例子。就让吾打一个比方唻讲伐，勒吾伲国家个北方语系词眼当中，要是讲家中个长辈吩咐小辈们去买一眼眼酒回唻，自然就会对小辈唻讲道：“今早仔吾伲个屋里向唻勒一位或一些邪气重要个贵客，侬豪扫拿上两个空瓶子，上酒铺子拨吾打两斤二锅头回唻！”……还要是讲，勒吾所在个城市上海，碰到此事时，长辈就会用沪语方言迭能对家中个小辈唻讲到个，曰：“今早仔，吾伲屋里向唻人客，覅用多去讲一眼啥么事个，眼板数侪是要留伊拉勒拉屋里向喫一顿夜饭个，囡囡要乖一眼，‘豪扫’拿一只老酒瓶去‘烟纸店’零拷一斤五加皮。”
像“烟纸店”是沪语方言，伊个意思是讲：杂货铺。像上头一段个沪语方言闲话意思是讲，因为今早屋里有客人唻到，覅管哪能也是要留客人喫一顿夜饭个，还要小辈去烟纸店去打一斤黄酒回唻。
【备注：勒上头一段沪语方言闲话当中，“豪扫”也是一句沪语方言俚语闲话，伊个意思就是勒讲：赶快、抓点紧、快一点儿。】
就勒掰搿辰光，但凡是搭“零拷”有关系个，基本浪唻讲伊个价钿侪覅是顶大、顶贵个，也侪是属于“零拷生意”“小生意”。
然而，伴随着辰光个覅断前进，科技个覅断发展搭进步以后，还伴随着各种大型个超市搭网络方面个销售，逐渐个流行起唻以后，像老底子“零拷”迭种销售模式，正勒逐渐淡出上海人个视野中。
对于今早仔个上海人唻讲伐，尤其是年轻一代个上海人唻讲伐，既呒没去经历过，也覅晓得个一桩事体，迭个就是－－勒老里八早个辰光，当国家搭绝大多数个老百姓，还侪处勒计划经济个年代里向，辰光就是勒1949年个10月份到1992年个12月份，还勒每日个俗常生活当中，勒上海迭座城市，基本浪向讲“一百样”商品侪是可以去零拷个，【备注：“一百样”并覅是讲只有一百样商品，而是泛指任何类型个商品。】也是拥有“勿勿少少个”，【备注：“勿勿少少个”是沪语方言闲话，意思是讲许许多多个。】吾至今为止依旧还能清爽个去记得迭能个一桩事体哩，就连小囡【备注：主要就是指少年儿童。】喫个各种小零食，也同样是可以去“零拷”个、零售去售卖个，而且还是以小包装三角包个形式出现。就勒吾个少年时期，有去购买并喫过“鱼皮花生”“无花果”“盐精枣”“牛肉干”“拷扁橄榄”等各种小零食。像迭些小零食，有一些是自家买唻吃个，还有一些是亲眷买拨吾喫个。只拨过，“零拷”顶顶主要个－－还是以零拷各种液体类别个物品搭商品为主。就打个比方唻讲伐：“零拷各种烧小菜个油”“零拷酱油”“零拷醋”……侪是每户人家必不可少、不可或缺个。
对于覅同个零拷类商品，所使用个容器也是大小覅大一样个。还比方讲：去零拷油、醋、酱油一类液体，勒通常情况下，侪是用“老酒瓶”去零拷个；【备注：上海人欢喜拨玻璃瓶子叫做“老酒瓶”。】要是去零拷“甜面酱”“花生酱”“芝麻酱”……之类个酱料时，覅是用饭碗零拷，就是用钢精锅子零拷，勒掰搿辰光是呒没塑料桶个，是覅用去担心因拨塑化（剂）污染，从而去影响到自家个身体。
对于某些交关了解上海迭座城市个历史搭人事物情个外省市人唻讲伐，还要是拨迭能个一类个人或人群，看到有关于“零拷”个种种情形以后，虽讲表面覅会讲啥么事，弄覅好就会拨迭一类人勒背后讥讽个唻讲道：“上海人做人也覅免太小家罢气，一眼侪覅够大方，买卖商品还要去零拷。”……实际浪迭种做派，上海人是有一种称谓叫做 “做人家”，就是属于一种勤俭节约个好行为，是会过日脚、精打细算过日脚个行为，搭国家大力提倡勤俭节约、覅要大肆个去浪费绝对是一脉相承个，上海人历唻就拥有精打细算做人家个好传统。
大家侪需要晓得迭能个一桩事体，迭桩事体就是－－除忒吾勒上头个文字当中，所去讲到过个各种液体类物（商）品搭喫个各种小零食可以去零拷以外，依旧是当国家还身处勒计划经济个年代里向，就连掰时勒俗常生活当中个方方面面，侪是可以去触及“零拷”、侪是搭零拷是有一丝一毫个关系个，也绝对可以去讲是应有尽有个。
再继续去打比方举例子说明，比方讲：大到室内装潢所使用个各种涂料、油漆、胶水等等，也同样是有零拷个，小到雪花膏、生发油、发蜡、“汏头膏”……【备注：“汏头膏”是沪语方言闲话，伊个意思就是今早仔个洗发水。】也照样是一式势样个，也是迭能样子，也是好去零拷回家个。迭个还不算啥么事，就算是勒文化用品方面，比方讲：所使用个各种墨水、粘贴用个浆糊……也同样可以去零拷回家个！今早仔个人邪气有可能是呒没办法、覅可去想象个，没想到老底子个人，勒掰搿辰光过日脚个辰光，覅管是何种商品侪能去零拷个。
吾始终还会去觉着，各种大个生意是一门生意，虽讲“零拷”也是一门生意，极有可能是一种邪气覅起眼个小生意、微不足道个，也是一个时期里向或某个时代独有个或物品或商品销售特征，也是拥有伊个优点个，伊个优点那就是－－可以去减少包装、按需求搭按照份数去购买，或多或少能减少对于各种剩物个浪费程度，相比较而言，伊个价钿又好去便宜一眼眼，绝对是值得大力去推广个，更可以讲是利国利民利己个好事体，真可谓是一举多得、好处多多哩！吾顺便要去请问一下大家，像迭能个一桩好事体，又何乐而不为之啊？！
吾仍旧能清爽个去记得迭能一桩事体，勒吾读小学时，国家还处勒计划经济个年代里向，爷老头子陆吉良勒县城上班个，伊一个礼拜只好回唻一趟，平常一到六个日脚里向，侪是由姆妈倪榴珍唻烧夜饭，一旦各种烧小菜个调料所剩覅多、只剩下一眼眼个辰光，吾就会搭姆妈一道去烟纸店零拷各种调料回唻。去零拷过醋、酱油、烧小菜个菜籽油、烧小菜用个料酒……吾还能清爽个记得，常桩性去零拷个迭家烟纸店，里向侪是属于上年纪个女性营业员（服务员），是呒没男性营业员（服务员）个，就勒其中还有吾个小学同学王巍个阿奶哩！
勒零拷各种液体搭调味料个辰光，营业员一只手拿着老酒瓶，再勒老酒瓶个上头，还套着一只小漏斗，吾记得勒最初个辰光，漏斗侪是竹制个，到后塞唻就改为塑料，另外一只手拿着同样是竹制个量勺伸进或陶器个大甏里向或大个铅桶里向，【备注：勒掰搿辰光，各式各样个液体调料多数侪是放置勒大个陶器甏里向个。】然后会飞快个去提起唻，通过漏斗倒入到老酒瓶当中，基本浪侪是用覅着再去称啥个分量个，侪是因为称量所使用个各种液体个勺子，侪是特制、定做、事先就去设计好个，伊个分量搭大小，是绝对覅会产生啥个差错个。营业员（服务员）依照顾客拷液体调料个需求搭分量就会晓得个，吾到底要勒大甏个里向，舀几趟、几勺子，而且速度侪是交关快个！
还记得，就勒掰搿年代个里向，大家基本浪侪是属于一个邪气老实本分类型个人，但凡是属于那些偷鸡摸狗鸡鸣狗盗以次充好坑蒙拐骗一类个事体，“绝对是”覅大可能去操作个，迭个又是为啥事体？！侪是因为一旦有去做，还一旦讲事体败露拨大家发觉以后，勿单单是属于“坍招势”呒没面子，而且勒掰时还是熟人社会，人与人之间几乎侪认得个，还会拨大家勒背后指点议论一番个，某些搭迭类人交关要好个亲朋好友们，晓得迭桩事体后，会尽可能去做到少接触、少搭伊往唻，要是勒路浪远远较看到时，就会像躲瘟神一样“压压较避避开”。【备注：“坍招势”是一句沪语方言闲话，伊个意思就是讲：丢脸面。“压压较”也是一句沪语方言闲话，伊个意思就是讲：悄悄的。“避避开”同样是一句沪语方言闲话，伊个意思就是讲躲避开。】
话虽讲是迭能样子唻，只拨过，也同样是会有例外个人，还会去发生一些例外个情况。要是吾呒没去记错，辰光就是勒1992年左右个辰光，吾搭姆妈经常会去光顾个迭家烟纸店，就勒其中，有一位上年纪个中老年营业员（服务员），年纪勒五六十岁左右，头发是花白颜色个。【备注：吾仍然还能清爽个去记得迭能个一桩事体唻，勒掰搿辰光，迭家烟纸店一共有两位营业员，每日只有一位营业员，是做一休一个，伊就是一位退休返聘人员。】吾为啥事体要提及此事搭迭个人？！
迭个是有一定个因素搭原因个，凡只要是勒伊当班个日脚里向，竟然就会做起各种以次充好坑蒙拐骗鸡鸣狗盗一类个覅好勾当。
伊之所以要迭能去操作，既是搭掰时提出个口号是息息相关个；也是搭伊本人个个人素质覅是邪气好个，亦同样是存在着一定个关系；更是因为伊看到其他人赚到过覅少个铜钿，照样是休戚相关个；就勒掰搿辰光，迭家烟纸店个上级部门是“供销社”，是受到“供销社”个管辖，【备注：“供销社”是属于计划经济年代里向个产物，伊勒某种情况下唻讲伐，也就等同于售卖各种商品个综合性商店，勒掰搿辰光，侪是专门为农民搭郊县城镇浪个居民服务个。】提出过“多劳多得、多多个去售卖各种类型个商品以后，就可以多拿工钿奖金”……
迭位中老年妇女，只为能够多多个去赚取一眼眼个铜钿，竟然就会勒各种液体类别个或调料或调味品当中，动起一股邪气覅好个歪脑筋唻，就会大批量个、去添加事先烧开个、凉透个白开水，侪是因为勒掰搿辰光，自唻水或白开水个价钿要比各种液体调料唻得便宜“勿勿少少”，多去添加凉白开水，就能赚取差价、多赚一眼铜钿。
伊自以为是个去认为，绝对覅会有人晓得此事个，没料想到个就是－－西洋镜竟然会拨戳穿，事体败露拨人发觉并举报伊，讲伊勒做以次充好坑蒙拐骗鸡鸣狗盗个坏事，买回去个液体调料味道是覅对个。经过上级部门认真仔细调查以后，事体确实就是迭能样子个，伊还坦白讲道，刚开始个辰光，还是有一眼眼个心虚“吓势势”，【备注：“吓势势”是沪语方言闲话，意思是害怕。】辰光一长久而久之，并呒没拨别人发觉，胆子也就变得越唻越大起唻，上级领导就开除忒伊！
勒掰时、勒覅同个季节，“零拷”也会拥有覅同个风景线哩，勒天气炎热个夏天季节里向，真个可以去讲是“热煞脱勒”，【备注：“热煞脱勒”是沪语方言闲话，意思是讲热死勒！】像“零拷散装啤酒”就应运而生。每日夜快头，辰光大约摸勒夜到五到六点钟，周围个居民，脚上趿拉着木拖板或海绵拖鞋，上身穿背心或老头衫，手里面拎着空个老酒瓶或热水瓶，去“零拷”啤酒，大多数人家是拎着热水瓶，某些交关喜欢喫一眼酒个人家，拎一只热水瓶恐怕是覅够个，弄覅好就会去拎两三只热水瓶，会排长长个队伍，长长个队伍弯弯曲曲蜿蜒曲折，要是讲勒排队个队伍当中，前头或后头是交关熟悉个邻居或朋友，还会一边排队零拷啤酒，一边嘎嘎讪胡（聊天），还会讲讲近抢把自家所晓得个各种趣闻轶事，也是市民夏天生活当中个一道风景线！
各位看官们，千万覅要去小看零拷啤酒，那些散装个啤酒，通过量勺慢慢较灌入到老酒瓶、热水瓶当中，泡沫相对而言就会唻得稀少一眼眼个，味道也会变得清淡苦涩，购买啤酒个顾客，还会特惠关照一下营业员（服务员），灌啤酒个辰光，请侬动作做得稍许慢一眼眼，操作覅要忒快哦，为此好去减少一眼眼啤酒个泡沫，凡是那些拎得清个营业员（服务员），覅用多讲眼啥么事，动作侪是慢个，零拷啤酒个价钿也仅仅只有“一角洋钿”，吾哪能会晓得啊？！侪是由家中欢喜喫眼酒个亲眷告诉吾个。【备注：“一角洋钿”就是指一角钱。】
同样也会有经过个路人，要是今早仔有人觉着天气炎热，可以讲是“热煞脱勒”，勒烈日下头走得口干舌燥嘴巴有一眼个干涩，也会去“零拷一杯啤酒”，倚靠勒排门板个上头，喫一杯啤酒解暑。
……
今早仔，“零拷”几乎是“覅复存在”，拨过，还是真心个去希望“零拷”又能重新恢复起唻，因为“零拷”勿单单是相对而言价钿便宜经济实惠，而且还邪气环保个，更用覅着担心因物品太多用覅忒，而去浪费忒，总而言之可以讲是一举多得好处多多。“零拷”搭今早仔国家所提倡个节约型社会是一脉相承个，又何乐而不为之？！
【备注：①：文章为作者原创；②：各种上海方言文字图片搭各种零拷类别个图片侪是唻源于网络上头；③：万分感谢原创图片。】
杜老倌侠客居（陆伟）写于2020年10月26日礼拜一夜里向
