དམར་ཁ་ཚ།

      མ་ཡུམ་ཞེས་པའི་སྙན་ཆ་དོད་ཅིང་འཇམ་ཤ་ཆགས་པའི་ཐ་སྙད་བརྗིད་པོ།ལྕེ་ངོས་ན་བདུད་རྩི་མངར་མོའི་ངང་ཚུལ་གྲུབ་ཅིང་ཁ་ནང་ནས་མིད་པར་འདེད་མི་བྲ་བའི་སྦྲང་དཀར་རྩམ་པ་ནས་དྲི་བྲོ་ས།རང་བཞིན་གྱིས་སེམས་སུ་ལྷུང་ཡོང་ཞིང་རློན་ཤ་ནེམ་པོ་ཅན་གྱི་མ་ཡུམ་དྲིན་ཆེན་མ།

    ཁྱེད་ཀྱིས་དོན་ངོ་མ་ཅན་གྱིས་དཀའ་ངལ་མྱོང་སོང་།ངས་སྟོང་བསམ་གྱི་གཤོག་པ་བསྐྱང་ནས་བུ་ཕྲུག་གཅིག་ཅི་ལྟར་མངལ་ལས་གསོ་བ་དང་སེམས་ཁམས་ལ་བདག་པོ་རྒྱག་སྟངས།ཟས་ཟ་མར་འཛེམས་ཚུལ་དང་འགྲོ་འདུག་སྤྱོད་གསུམ་ལ་དོགས་ཚུལ།ན་ཟུག་གི་འཁུན་སྒྲ་སྒྲོག་པའི་སྐབས་ཀྱི་སྦྲུལ་ནག་ལྟར་འཁྱུག་པའི་མ་ཡུམ་རེ་རེའི་གྲུབ་གཟུགས་མིག་ལམ་ལ་ཤར་བ་ཙམ་གྱིས་བརྒྱལ་ལ་ཉེ་ཡོང་།ངེད་མིང་སྲིང་བདུན་གྱི་ཡུམ་ཆེན་ཁྱོད་འདི་ལྟར་ལྕགས་བཙོ་མའི་རང་གཤིས་བཟུང་ནས་ཡོང་བ་འདི་ལྷ་མོ་རྗེ་བཙུན་མ་མི་ཡུལ་དུ་བྱོན་པ་ལས་གཞན་འགྲེལ་ཚུལ་མི་རྙེད།

   དྲིན་ཆེན་མ་ ང་ལོ་གཉིས་ལ་སོན་ཙམ་ཞིག་ལ་མིད་པ་ན་ནས་སྨན་པར་བསྟེན་དུས་ཁྱེད་ཀྱིས་སེམས་ཁུར་དང་རྔམ་པ་འཐེན་ཞོར།ང་པང་དུ་དམ་པོར་བཟུང་ནས་སྔས་མགོར་མགོ་བོ་ཞག་འགའ་ལ་གླན་གང་ནས་ཐུབ་ས་ལའང་སྡོད་མ་ཚུགས་པའི་སྣང་ཚུལ་དེ་ངས་དེ་རིང་རྟོག་བཟོ་བྱས་ན་ཡིད་ལ་གསལ་ལེར་འཆར་ཡོང་།ད་དུང་དེ་ཙམ་གྱི་ག་ལ་ཚད་དེ་ངེད་མིང་སྲིང་ཚོ་རྒྱུ་མ་འདེད་པ་བཞིན་འཕྲོའི་འཕྲོར་མགྲོན་དུ་ཡོང་དུས་སྐབས་དེའི་འཚོ་བ་སྟབས་བདེ་མིན་ཡང་ཐབས་ཆགས་དེའི་ཁྲོད་ནས་ཅི་འདྲའི་གནོན་ཤུགས་ཆེན་པོ་རེ་སྟེེར་ཡོད་རྒྱུ་རེད།རི་འགེལ་སྐབས་ངའི་ཨ་ཅེ་གཉིས་ཀ་ཆེ་མགོ་ཡིན་ཡང་རྟ་བཞོན་མི་ཐུབ་པས་གཡག་ལ་སླེ་བོ་རེ་རེའི་ནང་ལ་བཀལ་བ་དང་ང་དང་ངའི་ཕུ་བོ་ནུ་བོ་ཚང་མ་ལ་ལར་སྔོན་ལ་བཟུང་ལ་ལ་རྟའི་འཕོང་ལ་བསྡམས་པ་གོ་ཡོད།ཨ་ཕ་ནོར་རྫི་ཡིན་ལ་ཨ་མ་ཁྱོད་ལུག་རྫི་ཡིན་པའི་ཁ་བ་བབས་པའི་ཉིན་ཞིག་ལ་གཡང་དཀར་ལུག་རྣམས་སོས་དལ་བག་ཕེབས་ཀྱིས་བསྡད་འདུག་པ་མཐོང་སྟེ་ཁྱིམ་གྱི་ཉལ་སའི་ནང་གི་ང་ལྟོགས་ཀྱིན་ཡོད་སྣང་སྐྱེས་ཏེ་འོ་མ་ཞིག་ལྡུད་དུ་ཡོང་ཤུལ་ནས་ལུག་ཚང་མ་གནས་དེ་ནས་གཞན་པའི་ན་ཁུག་ལ་ཞོག་སོང་བ་མཐོང་བས་ན་ནང་ནས་ལུག་གི་རྩྭ་ཟོས་ན་གློ་འབུ་ཡོད་པར་ཞེད་ནས་ཨ་མ་ཁྱེད་ཀྱིས་ལྭ་འདབས་ལག་ལ་བཟུང་སྟེ་བརྒྱུག་བརྒྱུག་པའི་མཐའ་མར་ནུབ་མོ་ཁྱིམ་ལ་ལོག་དུས་རྐང་མགོའི་ལྷམ་སྦང་འདུག་པས།ལྷམ་ཆ་གཅིག་འདི་ལས་གྱོོན་རྒྱུ་མེད་བསམ་ནས་གོ་ཁའི་མེ་འོད་ལ་བསྲོས་རྗེས་ནུབ་ཚལ་སྟབས་བདེ་ཞིག་བཟས་ཏེ་བཞི་རུམ་ལྔ་རུམ་བྱས་ནས་གཉིིད་སོང་།ཕྱི་ཉིན་ཞོགས་པར་སྐྱ་རེངས་བུ་མོ་དང་མཉམ་དུ་མལ་ལས་ལངས་ནས་ལྷམ་ལ་རེག་དུས་ཞོག་ཁོག་བསྲེག་པ་བཞིན་ལྷམ་ཆ་གཅིག་པོ་དེ་མེ་འོད་ཀྱིས་བསྲེག་ནས་ཕྱི་ཤུན་ནང་ཤུན་ཕྱེ་ཡོང་ཟེར་བ་དེ་དྲན་ན་དགོད་སྤྲོ་ལ་ངུ་ཡང་འདོད།

   མ་ཡུམ་ལགས་བྱམས་ལྡན་མ།དེ་དང་དེ་འདྲ་བ་སུ་དང་གང་གིས་བཤད་པ་གོ་བའམ་ཁྱེད་ལ་དྲིས་དྲིས་པའི་ཚིག་ཕྲེང་རེ་གཉིས་ལས་མེད་ཀྱང་།དོན་དུ་ཡུམ་ཆེན་མ་ཁྱོའི་ལུས་གཟུགས་ཚུགས་དྲུག་སྨྱུག་མ་དེ་ང་ཚོའི་ཆེད་དུ་སྒུར་ཞིང་།སྐྲ་ལོ་རྒྱ་ལྕང་ལོ་མ་དེ་ང་ཚོའི་ཆེད་དུ་ཟད་ཅིང་དཀར།ཁྱེད་ཀྱི་སྐར་ཆེན་མིག་ཟུང་ཡང་ང་ཚོའི་སླད་དུ་འོད་མདངས་ཇེ་ཉམས་དང་མིག་ཆུ་ཇེ་མང་མིག་རྩ་ཇེ་དམར་རེད།མདོར་ན་དྲིན་ཆེན་མ་ཁྱེད་ཀྱི་དོན་ལྔ་སྣོད་དྲུག་ང་ཚོར་འབུལ་ཞིང་ཁྱེད་ཀྱི་ཡན་ལག་ལྔ་བོ་ང་ཚོའི་ཆེད་དུ་འཁུམ་སོང་བ།ཐ་ན་ཁྱེད་ཉིད་མི་ཡུལ་འདིར་གསོན་འདོད་པའི་རྒྱུ་རྐྱེན་ཡང་ང་ཚོ་དང་འབྲེལ་བ་དམ་ཟབ་ཡོད་པ་ཚོར་ཡོད་རྟོགས་ཡོད་ཤེས་ཡོད་བྱམས་ལྡན་མ།

                                             2016/04/01

                                                   ལན་གྲུ་ནས།