自从清朝个末期，国门畀打开唻以后，“上海”迭座城市就是属于中国最早畀开放个城市之一，勒拉1843年11月17日开埠，伊是根据《南京条约》搭《五口通商章程》个规定而被迫畀开埠个，而且伊还是属于一座五方杂处个城市，像这种类型个城市，是邪气容易接受外唻文化搭多元文化，因此讲城市文化是兼容并蓄兼而有之个。
勒拉交关多个上海文化搭上海方言闲话当中，覅可或缺个元素之一就是迭个－－“洋”字勒，伊见证勒上海迭座城市个昨天仔、今早仔搭明早仔，勒拉上海人个每日俗常生活当中，可以讲，绝对是离覅开迭个洋字个，很有可能伴随着时代个变迁，当历史个车轮走到勒今早仔，迭个“洋”字使用个频率并覅是邪气多，变得越唻越少，尽管是迭能样子，有时还能听到有人讲一眼搭“洋”字有关个闲话。
比方讲：就拿自家举一个例子唻讲伐，当辰光走到勒今早仔，本人已经是走过勒43年春秋，勒拉迭个43年春秋当中，还勒拉吾蓦然回首之间，突然之间就发觉勒一桩自认为交关有趣个事体，自家曾居住过两个城镇，侪都搭“洋”字脱覅了关系，邪气有得缘分个。
自家曾经所居住个第一个城镇，伊个名字叫做“高桥镇”，伊既有得800多年个历史，伊还拥有“营造之乡”个美誉，勒拉上海滩历史浪向，曾经就涌现出覅少就是属于建筑方面个专家搭大师。钟惠山曾经建造过“会乐里”“慎余里”等石库门弄堂建筑；叶宝星曾经建造过“衡山饭店”“永安公司”等建筑；杨瑞生建造过“淮海电影院”“星光大戏院”等建筑……就勒拉老个高桥镇上头，还有得一条街道，伊老底子个名字叫做勒“白洋滩”，今早仔伊个名字就畀修改成为“石家街”。到今早仔，吾还能够清爽个去记得，勒拉自家个少年时期里向，既覅管是到外婆张榴妹屋里向做人客白相相；也覅管是去浦西外滩、老城隍庙豫园、南京东路白相相；更覅管去居住勒拉虹口区东汉阳路上头个大姨父沈小兔搭大姨妈倪榴娣屋里向做人客白相相；“白洋滩”眼扳数要走过个，而且还是属于一条必经之路。
当吾长到16岁以后，因为家父陆吉良货币分房，购买一套新公房，屋里就搬迁，所搬迁居住个第尼个城镇，伊原先个名字叫做“洋泾镇”，伊是拥有700多年历史个古镇搭老镇，因为政府行政规划区域合并个原因，就并畀“花木镇”，今早仔个名称畀修改成为“花木镇洋泾地区”，伊所属个街道名称叫做“洋泾街道（社区）”。就勒拉老镇上头，还有得一条河浜，伊个名字叫做“洋泾港”，迭条河浜，北面好直通黄浦江，南面一直可以通到张家浜，搭张家浜连接勒拉一道，伊个全长大约摸有得六七公里，途径洋泾镇桥、南洋泾桥等地方。
勒拉中华民国时期个上海滩浪向，有得一条河浜，伊个长度只畀过有得十几米罢了，伊个名字就叫做“洋泾浜”，伊所在个地理位置就是今早仔个黄浦区延安东路。就勒拉中华民国时期个里向，迭条河浜个北岸是属于“英租界”个，勒拉河浜个南岸是属于“法租界”个，就勒拉掰搿辰光个里向，迭个两块地方还是属于“华洋杂处”哦，即：华人搭洋人相互之间是混合居住勒拉一道个，所以讲，像迭个两块地方个语言，侪是属于邪气混杂搭复杂个，只要是勒拉迭个两块地方“讨生活”个人，既覅管是属于土生土长个上海人；还覅管是其他城市唻到上海滩浪向个“新上海人”；更覅管是身处勒拉阿里一个社会阶层里向个人；像迭种类型个人，伊拉多多少少侪是会得去讲一眼眼外语个，还能够搭老外做一些交关简单个语言交流，伊拉最主要所讲个外语，侪是英语为主个。但畀过，迭些人所讲个英文，既属于覅是邪气正宗个，也覅是一口交关标准个英语口语，伊拉勒拉讲英文个辰光，往往侪会得去套用一些发音比较相近个国语，或者是某些地方方言闲话唻讲讲，因此讲，迭种英语口语一律畀叫做“洋泾浜英语”。
沪上已故两位滑稽大师姚慕双搭周柏春，有得一个滑稽戏经典段子叫做“学英文”，而且还有好几个版本，勒拉各种版本当中、勒拉其中共有个一段内容是讲：宁波人是哪能样子唻学习英文，伊拉讲英文口语，侪是属于“洋泾浜英语”，曰：“一块洋钿么温道罗（one dollar）！廿四呃铜钿么小店佛（twenty-four）。大大轮船史汀婆（steamboat），阴三谢堂（inside sit down）么里向…坐。”……
当时光迭辆列车开往到1916年，“洋泾浜”畀填平变成一条马路，“英租界”搭“法租界”一道变成为“公共租界”，但畀过，“洋泾浜”搭“洋泾浜英语”迭个两组词语却畀上海人保留下唻勒，一直沿用到今早仔，虽然讲今早仔讲个人唻得邪气少，勒拉有些辰光里向，还是会得听到有人勒拉讲迭个两句闲话个。但凡是做起各种事体唻覅够正宗，或者讲，看上去是属于有一眼眼喇叭腔、覅像腔个味道勒拉里向，还或者讲，讲起各种方言俚语搭外语覅是邪气正宗个，还覅是邪气流利个人，眼扳数要畀大家说道一番个，开口唻讲道：“迭个人做起各种事体邪气洋泾浜个！”“伊讲个是洋泾浜英语！”……
既因为上海畀开埠，还因为出现“英租界”搭“法租界”，因此讲，勒拉上海滩浪向，又滋生出一种新型个行当，名字就叫做“洋行”，“洋行”是外国商人勒拉中国设立个商行商号，中国顶顶早个洋行是勒拉1715年由英国东印度公司开设勒拉广州个商馆。自从拥有“洋行”以后，加之交关多个外国人覅懂得中国国情、地方方言搭中国人个各种人情世故，只为便于搭中国人做各式各样个生意，因此勒拉“洋行”里向，又聘请覅少头脑邪气活络、懂得各地方言、人情世故，还会得讲一眼眼英文个中国人，到洋行里向去做一个买办，凡是做迭种行当个人，侪是畀上海老百姓称之为“洋行买办”。假使讲，勒拉掰搿辰光，屋里向要是有人勒拉洋行里向做买办，覅仅是邪气洋气个一桩事体，而且还会得畀亲朋好友们称赞道：“哦呦喂，侬今早仔覅得了勒嘛，竟然也畀侬混格拉斯混到洋行里向去做一个买办啦！”……
勒拉中华民国时期个上海滩浪向，洋人聚集勒拉一道做各种生意个地方，侪是畀叫做“洋场”，因此讲，勒拉掰搿辰光个上海滩浪向，就有得“十里洋场”搭“十里夷场”迭个两种讲法。勒拉通常情况下头唻讲伐，老百姓讲“十里洋场”唻得交关多一眼眼，讲“十里夷场”迭个四个字，基本浪向侪是一些文人墨客，虽然讲中国已经是落伍，搭全世界比较起唻，差距是变得邪气大个，还被动个畀打开开放国门，但畀过，对一些文人墨客唻讲，多多少少侪是对老外看大覅起个，总觉着老外呒中国人唻得好，所以就用一个“夷”字唻贬低伊拉。
自从中国国门畀东西方列强打开唻以后，还自从大力开办各式各样个洋行之后，因此就覅得覅被动个输入交关多个舶唻商品，尤其是勒拉上海滩浪向，凡是由外国唻个各种商品，侪是要勒拉商品名字个前头去添加迭个“洋”字，之所以要去添加迭个“洋”字，侪是因为勒拉掰搿辰光里向，基本浪向，各式各样个商品，侪是要靠外国引进到中国唻，自家是制造覅出唻个，吾就举一些例子唻说明情况。
勒拉掰搿辰光里向，上海滩浪向个老百姓，就勒拉每日个俗常生活里向，有得交关多个事体搭么事，还侪是搭“洋”字搭界个。
就勒拉最初个中国，是呒没啥个电灯个，等到夜快头，天就会得变得邪气暗戳戳，照明所使用个么事，覅是照明用油，就是去使用蜡烛，迭个两样么事，就畀上海人叫做“洋油”搭“洋蜡烛”。自从拥有“洋蜡烛”迭个词语以后，长辈勒拉教育自家屋里向小辈个辰光，或者讲，一方要好好较去教育犯过错误个另外一方，就去发明一句上海方言闲话，曰：“侬迭个人啊，真是一个标标准准个洋蜡烛，勿点勿亮，只有点过勒以后，侪会得亮一眼眼！”……迭句闲话个意思是勒拉讲，只有当一个人喫过勒各种苦头、栽过勒各种跟头以后，自家侪会得晓得到底错勒拉啥地方，只有喫过亏个人，侪会得有长进，还只有自家受到过各种惩罚以后，侪会得去改正错误覅再去犯错。
勒拉老底子、勒拉上海滩个历史浪向，就有得两种邪气特别个房子哦，第一种房子：就是叫作“石库门”，伊融汇西方文化搭中国传统民居固有个特点跟特色，畀上海人叫做“新式里弄建筑”，侪是用石头唻做门框个，以乌漆实心厚木做门扇，是具有中国特色个上海居民住宅。第尼种房子：是模仿欧美房子个式样，属于独门独户类型个，并且勒拉房子个里向，还带有花园搭池塘，伊个层高并覅是邪气高个，顶顶高个高度也就到四层楼就封顶顶忒勒，迭种房子伊个占地面积也侪是有得覅覅少少个，通风搭阳光侪是属于邪气好个，像迭种类型个房子，覅是畀上海人叫做“洋房”，就是畀叫做“花园洋房”。就勒拉掰搿辰光里向，能够住得起“花园洋房”个人家，覅是属于邪气搛铜钿做各种大生意个老板，就是勒拉政府部门里向做高官个人。
因为勒拉房顶上头是要铺垫一层或几层瓦爿个，伊个大小勒拉七八寸大小个叫做“本瓦”，长度勒拉40公分，宽度勒拉20公分，有棱条纹个或黄颜色、或灰颜色个瓦爿，上海人就叫做“洋瓦”。
老上海人欢喜畀长得长长个白萝卜覅是叫作“白萝卜”，而是叫作“洋花萝卜”。学名叫“菊芋”个食物上海人叫做“洋姜”。
老上海人侪是晓得迭能一桩事体个，对于正宗个上海家庭妇女（主妇）唻讲伐，勒拉缝缝补补方面，覅仅是属于一把好手，而且还是属于覅可缺少个，对于每一户人家唻讲伐，就勒拉自家个房间里向，是覅要多讲点啥么事个，一定是要去配备一台“洋机”个，今早仔个上海年轻一代人，就覅一定会晓得迭个物品到底又是啥么事，它又畀老一代上海人叫做“铁车”。实际浪向所谓个“洋机”就是今早仔大家口中所讲个缝纫机，吾个家母倪榴珍曾购买过一台“蝴蝶牌”缝纫机。拥有“洋机”以后，也一定是要拥有“洋线团”个，勒拉老底子个辰光，“洋线团”侪是要凭票供应个，票子就叫做“民用线券”。
只要勒拉“铁皮”个上头去“镀上一层或多层‘锡’”迭种金属物质以后，或者讲，去“镀上一层或多层‘锌’”迭种金属物质以后，老一辈个老上海人侪是欢喜叫做“洋铅皮”或“洋铁皮”。勒拉上海地区个方言俚语闲话当中，但凡是覅值一眼眼铜钿个各种废弃物品，侪是畀叫做“洋铅皮”。凡是用洋铁皮制作而成个扫地所使用个物品－－“畚箕”，自然而然个畀叫做“洋铁畚箕”搭“洋畚箕”！
就连钉各种么事个钉子，勒拉最初个辰光，国人绝对是制造覅出唻个，也是呒没一点办法个，只好向国外去进口进唻，所以就取一个名字叫做“洋钉”。还因为上海人是唻得交关聪明个缘故，因此还去发明有迭能一句方言歇后语，叫做：“叉袋里厢掼洋钉－－‘里戳出’！”其中“掼洋钉”迭个词语，伊个意思勒拉讲，勒叉袋里向装有洋钉背勒自家个肩膀上头，歇后语“里戳出”迭个词语，伊个意思勒拉讲：钉尖既从袋子里向戳出唻，还畀戳破忒勒，畀自家个身体刺痛勒，迭句歇后语个意思就是讲－－勒拉或家庭或单位里向，有小人专门勒拉作祟，联合外人讲各种坏闲话、唻攻击并欺负自家人。
勒拉上海个各种方言俚语闲话当中，有得两组带有“洋”字个老词语，一定要放勒拉一道唻讲讲，只有迭能样子去做一个比较，侪能够品味出意思搭味道唻个。伊拉分别就是“洋腔”搭“洋相”，迭个两组词语个意思侪是勒拉讲，外国人所拥有个腔调搭样子到底是哪能个。勒拉老底子个中国人，搭外国人是覅大一样个，中国人个规矩又是啥么事呢？！有两个认得个人，覅管是亲朋好友，还是一道共事个同事，相互之间勒拉马路浪向碰着勒，平辈之间，勒拉通常情况下头唻讲伐，侪是打躬作揖，假使讲是碰着勒长辈以后，先要半下跪磕一个头，然后再去问一声好。洋人（外国人）就覅一样勒，是覅大讲究啥个大小搭辈分个，见面碰到勒以后，相互之间先是握个手，然后就是相互之间还要左右各去相相面孔、打一记kiss（接吻）。就算辰光走到今早仔，还有交关多个国人，还是覅大习惯外国人迭种做法个。对于老底子个上海人唻讲伐，“洋腔”搭“洋相”侪是指一种丑态，所以勒拉迭个两组词语个前头，侪是要去添加迭个“出”字哦，以此唻表示某些人，现在多多少少有一眼眼出丑勒，显得丑态毕露勒！
对中国人唻讲，勒拉邪气长个一段辰光里向，中国人所使用个瓶子唻讲伐，勒拉绝大多数个辰光，侪是用瓷土制作而成个，所以就畀国人叫做“瓷瓶”。自从清朝末期国门畀东西方个列强给打开唻以后，引进由玻璃去制作个瓶子，勒拉最初个辰光里向，侪是畀老上海人叫做“洋瓶”。勒拉老底子个辰光，如果有人去佩戴一副度数邪气深、镜片交关厚实个架梁，上海人覅是讲：“伊戴勒一副‘洋瓶底砣’。”上海人就是讲：“伊戴勒一副‘洋瓶砣底’。”对今早仔个上海人唻讲，恐怕就覅大晓得迭句闲话，只会得采用“架梁”或“梁兄”唻代替，曰：“侬戴个迭副‘架梁’度数还是邪气深个，镜片像啤酒瓶底一样厚实哦。”或者讲道：“侬去看呀，伊就是一个梁兄哦！”
对于老一辈个上海人唻讲伐，只要碰到某些脾气搭态度并覅是交关友好个人，脾气性格是有点古怪个，而且对方还是一个覅合群个人，还有一眼眼阴阳怪气个味道勒拉里向，上海人侪是会开口迭能唻讲对方个，曰：“迭个人忒西洋怪气，搭伊轧朋友交关沙度！”……
勒拉上海地区个各种方言俚语闲话当中，还有得两组词语，伊同样也是指出丑哦，可以讲是属于前头两组词语个比较级别个，就能够更进一步个说明出丑搭丑态毕露哩。伊拉分别就是讲：“洋（像）勿洋（像），三分洋（像）”搭“洋勿洋，腔勿腔”。前头迭个词语，伊个意思就是勒拉讲，既覅管是阿里一种脾气秉性一类个人；也覅管伊本人个年龄到底有多少个大小；更覅管伊本人从事个是啥个行当个；为人处世之道一定要拥有三分样子，要是讲，事情做得覅对路子、覅对头、覅会去操作个闲话，就是属于“洋勿洋，腔勿腔”个一类人，自然而然就会露出丑态，显得丑态毕露。有关于迭个方面个例子，还是拿吾自家唻举例说明，记得有一天随家父陆吉良去参加家父好友小孩个婚礼，其中有一道小菜名字叫做“鱼翅羹”，因为自家是第一趟喫迭道菜肴，也就脱口而出唻讲道：“吾觉得迭碗汤盅里向个‘线粉’是邪气好吃个！”就引起一桌子人哄堂大笑起唻，家父就开口训斥道：“侬覅了解情况，覅认得迭道小菜，是覅好瞎讲八讲点啥么事个，迭个也是难怪啊、覅好唻怪侬个，侬今早是第一趟喫这道小菜，迭道小菜是‘鱼翅’，而覅是叫做‘线粉’，要去记牢伊，从今往后就覅可以再去搞错！”……迭个辰光吾真个是“洋勿洋，腔勿腔”！【备注：勒拉上海方言俚语当中，畀喫个食物“粉丝”就叫做“线粉”。】
勒拉上海个各种方言俚语闲话当中，还拥有一些，既是属于交关有趣个，也是属于邪气有意思个词语，而且也侪是搭迭个“洋”字有得关系个。就让吾继续举一些例子唻加以说明迭种情况。比方讲：像“洋盘”迭个词语就是属于一个有趣个词语。有覅少个人总归会去认为，“洋盘”迭个词语，就是上海人独有个一种方言闲话，实际浪向，当吾专门去寻找“洋盘”迭个词语个历史脉络以后，就发觉到迭能一桩事体，除忒上海人会去使用“洋盘”迭个词语以外，身处勒拉其他地方个人，也同样会去使用“洋盘”迭个词语个。对于四川人搭重庆人唻讲伐，勒拉迭个地区个方言俚语当中，“洋盘”专门就是指：“洋气”搭“拉风”。勒拉石家庄矿区一带个闲话，“洋盘”迭个词语专门就是指：扫地所使用个簸箕，伊是用“白铁皮”制作而成个。
勒拉中华民国时期个上海滩浪向，还勒拉掰搿辰光个上海文学作品当中，同样会得采用“洋盘”迭个词语。勒拉掰搿辰光，就有一位笔名叫做“蘧园”个作家，伊原来个本名叫做“欧阳巨源”，伊本人个生卒年月日是呒没办法知晓个，也呒没办法去考证个，伊本人撰写有《负曝闲谈》一书，《负曝闲谈》迭本书是《廿载繁华梦》搭《负曝闲谈》两部谴责小说合集。勒拉第九回当中，伊本人是迭能唻写到个，曰：“且说京城里有个阔公子，姓孙，排行老六，正是北边人所谓‘冤桶’，南边人所谓‘洋盘’。”著名作家、文学评论家茅盾先生，勒拉《第一段的故事》六中，有去撰写过迭能一句闲话哦，曰“我才不来呕这口闲气，花这路冤钱，让那只寡老背地里笑我是洋盘。”
勒拉上海方言俚语闲话当中，对于“洋盘”迭个词语，伊还是拥有两种含义搭解释个，而且还侪是带有贬义个色彩勒拉里向个。
第一层含义搭意思是勒拉讲：某一些个人或人群，为人处世之道就是属于覅懂装懂类型个人，明明自己是一眼眼也覅懂得个，偏偏要伪装成为一个邪气懂个人，以外行人唻冒充内行人。上海人就会得去认为，像迭种人就是属于“硬装斧头柄”，且勒拉“冒大蒜”。
第尼层含义搭意思是勒拉讲：对于某些个人或人群而言，因为自家覅懂装懂因而出洋相，并且像迭种类型个人会吃（大）亏个。
对于第尼层含义搭意思，吾认为仍然要举两个例子，从而能更好个讲明白迭种情况搭意思！比方讲：对于某一样物品唻讲伐，实际浪向顶多只要支付人民币廿块洋钿就可以畀伊购买下唻个，然而，就是因为购买者，既覅大了解市场方面个行情，对于市面浪向个行情还是属于知之甚少个缘故，从而就会造成像迭种类型个人，花费忒120元人民币买下唻，像迭种人就是一个标准个洋盘。某些欢喜把玩各类收藏品个爱好者，欢喜收藏各式各样个收藏品，伊本人满心欢喜个畀一件收藏品购买回唻，自以为自家是邪气懂得个，实际买个是赝品，畀赝品当作一件真品收藏品唻收藏，迭种人同样也叫做“洋盘”。
嘎么，像“洋盘”迭个词语，伊个出处又是从啥地方唻个呢？！伊到底会得有啥个讲法呢？！伊个出处同样也是有两种讲法个。
第一种讲法是讲：“洋盘”主要针对个就是－－勒拉中华民国时期【备注：勒拉旧社会。】嘲讽、讽刺那些洋大人个。【备注：勒拉掰搿辰光，上海人或者其他地区个中国人，对于从外国唻到中国个外国人，侪是叫做“洋大人”，而且还侪是以男性为主。】虽说迭些唻到中国个各位外国洋大人们，勒拉平常日脚个里向，作威作福可以讲是习惯成自然，畀过每趟到茶馆店里向以后，因为覅懂当地人个规矩，经常性会畀戏弄一番个。比方讲：要喫茶，门资就要去加倍，起码要去翻一倍个价钿，而且还喫覅到原本可以免费个茶水，覅仅是迭能样子，虽说是花费高于规定价钿个门资，但得到却是邪气推板个服务。
第尼种讲法是讲：“洋盘”迭个词语原本是写作“佯盘”两个字，老板假姿假眼勒拉拨弄算盘，算出唻个价格并覅是属于实价。顾客就按照老板计算出唻个价格付铜钿，自然就是要喫亏个。原唻属于欺诈个行为，到后末来，就引申为覅懂计算而邪气容易畀欺骗个人。
比方讲：做各种生意个老板，顶顶欢喜、顶顶愿意碰着一些缺乏主见、覅晓得行情、覅领市面个顾客。勒拉迭个辰光价钿就好由老板随意个开价，老板还会暗戳戳个用沪语对伙计讲：“迭个外地人是只洋盘、洋冲（葱）头，吾伲要狠狠较去斩伊一刀，伊个老外也同样是只洋冲（葱）头，也好畀吾伲斩一刀个，迭个嘛就叫做，走过路过覅要错过，还有个就是，要是有斩覅斩，就是一只猪头三！”……
自从上海也畀开埠以后，只要是从外国进口唻到上海个各类商品，畀上海人侪是叫做“洋货”，迭个还覅算啥么事个，“洋货”还要畀区分为“东洋货”搭“西洋货”，勒拉通常情况唻讲伐，“东洋货”主要指个是“日本洋车”，“西洋货”主要指个是“西洋镜”。
“日本洋车”上海人就畀伊简称叫“东洋车”，畀过，最为正确个讲法还是叫做“人力车”唻得邪气好，迭个其实就是作家老舍笔下骆驼祥子所拉个车子，侪是因为是从日本引进到中国唻个，所以讲就取名字叫做“东洋车”，迭个还是上海滩继轿子以后，顶常见个一种交通工具，到后末唻，迭种车辆个颜色多数油漆成为“黄颜色”，勒拉绝大多数个情况侪是作为包车唻用，又改名叫做“黄包车”！
今早仔有得交关多个上海人，还覅一定会晓得并认得“西洋镜”是啥个玩意儿。“西洋镜”迭个词语是上海人个叫法，还畀上海人叫做“西洋景”，勒拉北方地区，尤其是北京人，欢喜叫做“拉洋片”，洋人则欢喜叫做“peep show”。伊是由欧美传入到吾伲国家个一种逗乐装置游戏，伊是依靠一只大箱子，勒伊个正面就有得三只孔洞，孔洞面积覅是邪气大个，只好容纳一个人去看看。伊个里向有类似于幻灯片个图像，勒摊主个手里向有一根绳子，每趟仔去拉动一下，就会得调换一张图像，摊主还会根据图像个画面自编自唱，只因为迭些图片侪是从外国引进到中国唻个，所以就畀国人叫做“拉洋片”。
“拉洋片”或“西洋镜”，伊个原理侪是依靠“光学原理”，是需要人去暗箱操作个，所以讲多多少少就显得有一眼眼个神秘感，一旦大箱子畀打开唻以后，里向只是拥有几张图片而已，是呒没其他么事好去讲讲个，也是呒没啥好稀奇个。因为箱子里向有得各种新奇个故事，因此讲勒拉老底子上海滩浪向，“看西洋镜”就演变成为方言俚语俗语。勒拉上海方言俚语闲话当中，只要畀大家看破门道搭机关以后，有露馅、事情败露，就叫做“拆（戳）穿勒西洋镜”……
吾是一个土生土长个上海人，勒拉今早仔个虹口区四川北路，勒拉20世纪80年代个辰光，迭条街浪向有各式各样、大大小小买卖各种布料个布店。对于像“布店”迭种类型个商店，勒拉一般情况下唻讲伐，老一辈个上海人通常侪是叫作“洋布店”，为啥会得有迭能一种称呼呢？！侪因为勒拉老底子，勒拉交关长个一段辰光里向，国人制作个布料，侪是以“家庭作坊”为主个，迭种布料就畀国人叫作“土布”，因为布店里向出售个各式各样个布料，侪是由机器制作而成个，因此讲凡是由机器制作个“机织布”，侪是畀叫作“洋布”个。
拥有“洋布店”，自然就有得营业员个，像迭种类型个人员，老上海人侪是叫作“洋布店倌”。勒拉老底子迭个也是属于邪气喫香个一种行当。尤其是贩卖呢绒个“洋布店倌”，只认衣衫覅认人。据说永安公司老板曾经教导过自家个“洋布店倌”：“客人是覅可以赶跑个，畀过太低档个就好规劝伊离开，否则其他客人就覅敢唻。”
据吾所了解到个历史情况，勒拉老底子个辰光，【备注：辰光主要是指中华民国时期个里向。】但凡是某些从事“洋布店”行当个“洋布店倌”，尤其是勒拉呢绒布店里向工作个“洋布店倌”，就是属于顶会“看山水”一类个人，上海个方言俚语闲话当中“看山水”就是指会察言观色个一类人，也是拥有自家个“小算盘”搭“工作脚本”个。但凡是看到唻到店铺里向个客户，还只要是对方就是属于衣衫覅整有一眼破破烂烂个，而且还是属于东张西望个顾客，自然就是用覅着多去讲点啥个么事个，一看就是买覅起呢绒个。就会侪是硬生生个扯大嗓门用沪语方言搭对方唻讲道：“要买‘卡其布’个闲话，勒浪对过，到对过是有个。”……“卡其布”是由棉、毛、化学纤维混纺而成个一种织品，勒拉掰搿辰光是属于低档次个布料，迭句话语个意思是讲：侬就是买覅起好布料个穷鬼，覅要唻吾伲此地干扰吾伲做生意。
勒老底子个上海，自家卧室个里向，所铺设个地板要是用个侪是进口个松木，上海人就叫作“洋松地板”。畀家居漆上一层或多层个合成漆，覅是传统个中国漆，叫涂过“洋漆”，中国漆叫本漆。
勒拉各种上海方言俚语闲话当中，上海人还交关欢喜去讲“卖洋”搭“卖洋三千”两组词语，伊拉个意思就是讲：某人就是属于一个酷爱到处去炫耀一番个人。勒拉“卖洋”个后头去添加“三千”，就是属于加强版本，就让吾最后一趟再唻举例说明迭种情况。比方讲：老张搭老李迭两个人就是属于邪气要好个朋友，某天仔彼此之间勒拉马路浪向碰着以后，两个人勒拉一到谈山海经个辰光，老李就会时覅时个看看佩戴勒拉手浪向上个世界名牌手表劳力士，还要搭老张讲啥个手表是伊个女婿买畀伊作为生日礼物，就是因为女婿晓得老李欢喜戴手表。老张用上海沪语方言开口对老李去讲：“算侬搛着一个好女婿，忒侬买只好手表，阿覅晓得侬勒拉卖洋三千点啥么事啊！”……
文章撰写到此地也已是文末，就此搁笔，难免会有挂一漏万个，要是再好好较去寻觅搭“洋”字有关系个上海方言闲话，还能寻找到交关多个，吾伲只要是用心去寻找，总归是可以去寻得着个……
【备注：①：文章为作者原创；②：各种上海方言俚语词语图片搭范福生老上海风情画侪是唻源于网络上头，图文邪气有可能是属于覅相匹配个；③：万分感谢原创图片。
杜老倌侠客居（陆伟）写于2019年11月09日礼拜六夜里向
